కోటి ఇళ్లకు ఉచిత విద్యుత్
ముద్ర వార్తలు 
- ‘సూర్య ఘర్’ను ప్రారంభించిన మోడీ
న్యూఢిల్లీ : సౌర విద్యుత్ వినియోగాన్ని మరింత విస్తరించి సామాన్య పౌరులపై కరెంట్ చార్జీల భారం తగ్గించేందుకు వీలుగా కేంద్రం ‘పీఎం సూర్య ఘర్: ముఫ్త్ బిజ్జీ యోజన’ పథకాన్ని మంగళవారం ప్రారంభించింది. ఈ మేరకు ప్రధాని నరేంద్రమోడీ ప్రకటన చేశారు. ఇందుకోసం సంబంధిత వెబ్సైట్లో దరఖాస్తు చేసుకోవాలని కోరారు. ‘మరింత స్థిరమైన అభివృద్ధి, ప్రజల శ్రేయస్సు కోసం ‘పీఎం సూర్య ఘర్: ముఫ్త్ బిజ్లి యోజన’ పథకాన్ని ప్రారంభిస్తున్నాం. రూ.75 వేల కోట్ల పెట్టుబడితో తీసుకొస్తున్న ఈ ప్రాజెక్ట్.. ప్రతినెలా 300 యూనిట్ల వరకు ఉచిత విద్యుత్ను అందించి కోటి కుటుంబాల్లో వెలుగులు నింపాలని లక్ష్యంగా పెట్టుకున్నాం. దీని కింద అందించే సబ్సిడీలను నేరుగా ప్రజల బ్యాంకు ఖాతాల్లో జమ చేస్తాం’ అని ప్రధాని మోడీ ట్విటర్ లో వెల్లడించారు. ఇందుకోసం pmsuryaghar.gov.in లో దరఖాస్తు చేసుకోవచ్చని మోడీ వెల్లడించారు.
