ఎవరా దెయ్యాలు..?

ముద్ర, తెలంగాణ బ్యూరో: గులాబీ పార్టీలో ఎన్నడు లేనంతంగా రాజకీయాలు హీటెక్కాయి. ముఖ్యంగా  ఆ పార్టీ  ఎంఎల్ సి కవిత చేసిన వ్యాఖ్యలు ప్రస్తుతం బీఆర్ఎస్ లో ప్రకంపనలు సృష్టిస్తున్నాయి. సాక్షాత్తూ పార్టీ అధినేత, మాజీ ముఖ్యమంత్రి కేసీఆర్ కూతురే  ఆయన చుట్టూ దెయ్యాలు, కుట్రదారులు ఉన్నారంటూ  చేసిన కామెంట్స్ ప్రస్తుతం రాష్ట్ర రాజకీయాల్లో తీవ్ర దుమారం రేపుతున్నాయి. ఈ వ్యాఖ్యలతో కల్వకుంట్ల కుటుంబంలో కుంపటి రాజుకుంది.కవిత రెబెల్ అయ్యారు. కేసీఆర్ చుట్టూ దెయ్యాలు, పార్టీలో కోవర్టులు అంటూ కాక రేపారు.  దీంతో  గులాబీ పార్టీ ఒక్కసారిగా షాక్ కు గురైంది.కేసీఆర్ దేవుడు ఆయన చుట్టు ఉన్నవారే పార్టీ చెడగొడుతున్నారని కవిత చేసిన వ్యాఖ్యలు కేవలం ఒక్క గులాబీ పార్టీలోనే కాకుండా  రాష్ట్ర రాజకీయాల్లోనూ ఆసక్తికరంగా మారాయి.రాష్ట్ర ప్రజలు కూడా బీఆర్ఎస్ లో జరుగుతున్న పరిణామాలను చూసి అవాక్కు అవుతున్నారు. నిన్నా, మొన్నటి వరకు మౌనంగా ఉన్న కవిత ఒక్కసారిగా బ్లాస్ట్ అవ్వడానికి గల కారణాలేంటీ అన్న అంశాలపై పెద్దఎత్తున  చర్చ జరుగుతోంది. మరి కేసీఆర్ చుట్టూ ఉన్న దెయ్యాలు కేటీఆర్, సంతోష్ రావు, హరీశ్ రావు లేనా?  అన్నదానిపై  వాడివేడిగా చర్చ సాగుతోంది.ఆ దెయ్యాలు ఎవరు అనేది ఇప్పుడు రాష్ట్ర రాజకీయాల్లో  చాలా ఆసక్తికర చర్చ సాగుతోంది.

రాష్ట్ర రాజకీయాలను యమరంజుగా మార్చేసింది.వాస్తవానికి కేసీఆర్ కు కవిత రాసిన లేఖలో అంత ఇంట్రెస్టింగ్ మేటర్ ఏమీ లేదు.అంతా సో సో గానే ఉంది. కానీ, ఆ లేఖ లీక్ కావడమే ఇంట్రెస్టింగ్ మేటర్.విదేశాల నుంచి కవిత ల్యాండ్ కావడంతో  రాజకీయ డ్రామాకు మరింత హైపు వచ్చినట్లు అయింది. కేసీఆర్ చుట్టూ దెయ్యాలు ఉన్నాయంటూ సంచలన కామెంట్స్ చేశారు.పార్టీలో కోవర్టులంటూ కాక రేపారు.ఆ దెయ్యం ఎవరు? ఆ కోవర్ట్ ఎవరు? అంటూ కారు కుదుపులకు లోనైంది. ఆమె చేసిన వ్యాఖ్యలపై ఎవరూ స్పందిస్తారన్న అంశం కూడా పార్టీ వర్గాల్లో చాలా ఆసక్తిని కలిగించింది. దీంతో  పార్టీ వర్కింగ్ ప్రెసిడెంట్ కేటీఆర్ శనివారం ఎట్టకేలకు మీడియా ముందు వచ్చారు. పార్టీ అధ్యక్షులకు ఎవరైనా లేఖ రాయొచ్చు అభిప్రాయాలు చెప్పొచ్చు మా పార్టీలో ఓపెన్ కల్చర్ ఉందంటూ చాలా లైట్ మోడ్‌లో కేటీఆర్ మాట్లాడారు. అయితే, అంతర్గత వ్యవహారాన్ని అంతర్గతంగానే మాట్లాడాలంటూ ఓ చురక అంటించారు.

ఆ దెయ్యాలు ఎవరనే ప్రశ్న రాష్ట్ర రాజకీయ వర్గాల్లో తీవ్ర చర్చకు దారితీస్తోంది. కొందరు ఈ వ్యాఖ్యలు కేటీఆర్‌ను, హరీష్ రావును ఉద్దేశించినవని ఊహాగానాలు చేస్తున్నారు. కవిత లేఖలో పార్టీలోని కొందరు నాయకులు స్వలాభం కోసం పనిచేస్తూ పార్టీకి నష్టం కలిగిస్తున్నారని సూచించడం ఈ అనుమానాలకు బలం చేకూర్చింది.ఈ లేఖ లీక్ కావడం వెనుక ఉద్దేశపూర్వక కుట్ర ఉందని కవిత స్వయంగా పేర్కొనడం గమనార్హం.ఈ సందర్భంలో కేటీఆర్, హరీష్ రావుల పేర్లు సామాజిక మాధ్యమాల్లో తరచూ ప్రస్తావనకు వస్తున్నాయి.ప్రస్తుతం కేటీఆర్, హరీష్ రావులు బీఆర్‌ఎస్‌లో కీలక నాయకులుగా ఉన్నారు. కేటీఆర్ పార్టీ వర్కింగ్ ప్రెసిడెంట్‌గా, హరీష్ రావు పార్టీలో ప్రముఖ నాయకుడిగా గుర్తింపు పొందారు. కవిత లేఖలో పార్టీ నాయకత్వంలోని లోపాలను ఎత్తిచూపడం,కొందరు నాయకులు పార్టీని బలహీనపరుస్తున్నారని పేర్కొనడం వీరిద్దరిపైనా అనుమానాలను రేకెత్తించింది.సామాజిక మాధ్యమాల్లో కొందరు కేటీఆర్, హరీష్ రావులు కవితను పార్టీలో ఒంటరి చేయడానికి ప్రయత్నిస్తున్నారని ఆరోపిస్తున్నారు. అయితే, కవిత స్పష్టంగా ఎవరి పేర్లనూ ప్రస్తావించలేదు, ఇది ఊహాగానాలకు మరింత తావిచ్చింది. ఈ లేఖ లీక్ వెనుక కేటీఆర్, హరీష్ రావులు ఉన్నారనే ఆరోపణలు ఆధారరహితంగా కనిపిస్తున్నాయి.ఈ లేఖలో కవిత పార్టీలోని కొందరు “కోవర్టుల” వల్ల నష్టం జరుగుతోందని పేర్కొన్నారు.ఈ వ్యాఖ్యలు కేటీఆర్, హరీష్ రావులను ఉద్దేశించినవి కాకపోవచ్చు. బదులుగా, పా ర్టీలోని ఇతర నాయకులు లేదా కేసీఆర్‌కు సన్నిహితంగా ఉంటూ వ్యూహాత్మక నిర్ణయాలను ప్రభావితం చేసే వ్యక్తులను సూచిస్తూ ఉండవచ్చు. కవిత ఈ లేఖను అంతర్గతంగా రాసినట్లు చెప్పినప్పటికీ, దాని బహిర్గతం కావడం పార్టీలోని విభేదాలను బయటపెట్టింది.ఈ సంఘటన కేసీఆర్ నాయకత్వంపై ఒత్తిడిని పెంచింది, అదే సమయంలో కవిత ఉద్దేశం పార్టీని బలోపేతం చేయడమేనని ఆమె స్పష్టం చేశారు.