జనతా గ్యారేజ్’లా తెలంగాణ భవన్

ముద్ర, తెలంగాణ బ్యూరో: రాష్ట్రంలో ఎవరికి కష్టమెచ్చిన తెలంగాణ భవన్ తలుపులు తడుతున్నారని బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. అన్ని వర్గాల ప్రజలకు తెలంగాణ భవన్ ఒక జనతా  గ్యారేజ్ గా మారిందన్నారు. ఒక విధంగా చెప్పాలంటే తెలంగాణ ప్రజల గుండె ధైర్యం గులాబీ జెండా  అన్నారు.బుధవారం హన్మకొండ జిల్లాలోని ఎల్క తుర్తిలో  బీఆర్ఎస్ పార్టీ ఈ నెల 27న తలపెట్టిన రజతోత్సవ సభా ఏర్పాట్లను  ఆయన పరిశీలించారు.ఈ సందర్భంగా కేటీఆర్ మాట్లాడుతూ, రజతోత్సవ సభకు లక్షలాదిగా ప్రజలు తరలిరానున్నారన్నారు. కేసీఆర్ ప్రసంగం వినేందుకు ఎంతో ఆసక్తిగా రాష్ట్ర ప్రజలు ఉన్నారన్నారు.ఈ సభకు సభకు వరంగల్‌ వేదిక కావడం గర్వకారణంగా ఉందన్నారు.  సభకు వచ్చే వారికి ఎలాంటి ఇబ్బంది లేకుండా వెయ్యి ఎకరాల్లో పార్కింగ్‌ సౌకర్యం ఏర్పాటు చేశామని చెప్పారు. 30-40 వేల వాహనాలు వచ్చినా ఎలాంటి ఇబ్బంది ఉండదన్నారు.10 లక్షల వాటర్‌ బాటిల్స్‌, మజ్జిగ ప్యాకెట్లు, వెయ్యికి పైగా వైద్య బృందాలు, 20 అంబులెన్స్‌లు ఏర్పాటు చేశామని చెప్పారు.కాంగ్రెస్‌ ప్రభుత్వంలో కరెంటు మీద నమ్మకం లేదని కేటీఆర్ అన్నారు. అందుకే సభ కోసం 200 జనరేటర్లను ప్రత్యేకంగా ఏర్పాటు చేశారని తెలిపారు.ఉమ్మడి వరంగల్‌ జిల్లా నాయకులందరూ సభ ఏర్పాట్లను పరిశీలిస్తున్నారని పేర్కొన్నారు. బీఆర్‌ఎస్‌ చరిత్రలోనే ఎల్కతుర్తి సభ భారీ బహిరంగ సభగా నిలుస్తుందని ధీమా వ్యక్తం చేశారు.బండి ఎనక బండి గట్టి పద్ధతిలో పెద్ద ఎత్తున సూర్యాపేట రైతన్నలు వస్తున్నారని తెలిపారు. సభ కోసం 2వేల మంది వాలంటీర్లు పనిచేస్తున్నారని పేర్కొన్నారు.ఈ నెల 27న 12796 గ్రామ పంచాయతీల్లో గులాబీ జెండాలు ఎగురవేయాలని పిలుపునిచ్చారు.కదం తొక్కిన ఉత్సాహంతో ఛలో వరంగల్‌ సభకు చేరుకుందామని అన్నారు.కాంగ్రెస్‌ అరాచక పాలనను వరంగల్‌ సభలో ఎండగడుదామని అన్నారు.11 ఏళ్లుగా బీజేపీ తెలంగాణకు అన్యాయం చేస్తుందని కేటీఆర్‌ విమర్శించారు. కేసీఆర్‌ సందేశాన్ని గులాబీ సైనికులు ప్రతి గ్రామానికి చేర్చాలని సూచించారు.