ముద్ర కూకట్పల్లి :
శంషిగూడలోని శ్రీ నక్షత్ర రూప అయ్యప్ప స్వామి దేవస్థానం ట్రస్ట్ ఆవరణలో నూతనంగా నిర్మించిన శ్రీ పద్మావతి అలివేలుమంగ సమేత లక్ష్మీ వెంకటేశ్వర స్వామి విగ్రహ యంత్ర ప్రతిష్ఠా మహోత్సవం శనివారం అత్యంత భక్తిశ్రద్ధలతో, ఘనంగా జరిగింది.
ట్రస్ట్ చైర్మన్ భాస్కర్ ఆధ్వర్యంలో నిర్వహించిన ఈ ఆధ్యాత్మిక కార్యక్రమానికి ముఖ్య అతిథిగా బండి రమేష్ హాజరయ్యారు.
ఈ ప్రతిష్ఠా మహోత్సవం సందర్భంగా ఆలయ అర్చకులు వేద మంత్రోచ్చారణల మధ్య, శాస్త్రోక్తంగా హోమాలు మరియు ప్రత్యేక పూజలు నిర్వహించారు. బండి రమేష్ స్వామివారిని దర్శించుకుని, ప్రత్యేక హారతి కార్యక్రమంలో పాల్గొన్నారు. అనంతరం వేద పండితులు ఆయనకు ఆశీర్వచనాలు అందజేశారు.
కార్యక్రమం అనంతరం ఆలయ కమిటీ సభ్యులు బండి రమేష్ను శాలువాతో కప్పి, స్మారక చిహ్నంతో ఘనంగా సత్కరించారు. ఈ సందర్భంగా ఆయన మాట్లాడుతూ.. భక్తి మార్గం ద్వారానే మానసిక ప్రశాంతత లభిస్తుందని, శంషిగూడలో ఇలాంటి గొప్ప ఆలయం నిర్మించడం అభినందనీయమని కొనియాడారు.
ఈ కార్యక్రమంలో ఆలయ కమిటీ సభ్యులు, స్థానిక నాయకులు, పెద్ద సంఖ్యలో భక్తులు పాల్గొని స్వామివారిని దర్శించుకున్నారు. భక్తుల రాకతో శంషిగూడ ప్రాంతం ఆధ్యాత్మిక కోలాహలంగా మారింది