డిమాండ్ను విజయవంతంగా నెరవేర్చిన రాష్ట్రం
రాష్ట్ర చరిత్రలోనే అత్యధిక విద్యుత్ డిమాండ్
భవిష్యత్తు విద్యుత్ అవసరాలకు సిద్ధంగా ఉన్నాం
విద్యుత్ సంస్థలకు డిప్యూటీ సీఎం భట్టి అభినందనలు
ముద్ర, తెలంగాణ బ్యూరో :
తెలంగాణ రాష్ట్రం మరోసారి తన అప్రతిహత ప్రగతిని చాటుకుంది. రాష్ట్ర చరిత్రలో అత్యధికంగా మంగళవారం ఒక్క రోజే 18,139 మెగావాట్ల విద్యుత్ డిమాండ్ తో ఆల్ టైం రికార్డు సృష్టించింది. రాష్ట్ర విద్యుత్ సంస్థలు మంగళవారం ఉదయం 11:01 గంటలకు నమోదైన 18,139 మెగావాట్ల గరిష్ట విద్యుత్ డిమాండ్ను ఎలాంటి అంతరాయం లేకుండా సమర్థవంతంగా నిర్వహించాయి, ఇది రాష్ట్ర చరిత్రలో ఇప్పటివరకు నమోదైన అత్యధిక గరిష్ట డిమాండ్ అని డిప్యూటీ సీఎం భట్టి విక్రమార్క తెలిపారు. రాష్ట్ర విద్యుత్ సంస్థ చరిత్రలోనే గరిష్ట డిమాండ్ ను ఎటువంటి ఆటంకాలు లేకుండా విజయవంతంగా పూర్తిచేసి నాణ్యతతో కూడిన విద్యుత్ సరఫరా చేసిన విద్యుత్తు రంగంలోని ఉన్నతాధికారులు, యావత్ సిబ్బందికి డిప్యూటీ సీఎం ఈ సందర్భంగా అభినందనలు తెలిపారు. ఈ మేరకు మంగళవారం ప్రకటన విడుదల చేశారు. ఈ మైలురాయి తెలంగాణ ఆర్థిక వృద్ధి, కార్యనిర్వహణ సామర్థ్యం, అద్భుత సమన్వయానికి నిదర్శనం అని అందులో పేర్కొన్నారు. భౌగోళికంగా చిన్న రాష్ట్రం అయినప్పటికీ, పెద్ద రాష్ట్రాల గరిష్ట లోడ్లను సమానంగా లేదా అధిగమించే స్థాయికి చేరుకున్నామని హర్షం వ్యక్తం చేశారు. ఈ ప్రగతి పారిశ్రామిక, వ్యవసాయ, పట్టణాభివృద్ధిలో మన వేగాన్నిస్పష్టం చేస్తోందన్నారు. సమకాలీన అవసరాలను తీర్చడంతో పాటు రాబోయే వేసవి గరిష్ట డిమాండ్లకు ముందస్తు ప్రణాళికలతో తెలంగాణ పూర్తిగా సిద్ధంగా ఉందని భట్టి తెలిపారు. బలమైన గ్రిడ్ వ్యవస్థ, ముందుచూపు ప్రణాళిక, సమన్వయంతో ఉన్న వ్యవస్థ మన బలం అన్నారు. తెలంగాణ విద్యుత్ రంగం అభివృద్ధిని ముందుకు నడిపేలా రూపుదిద్దుకుందని చెప్పారు. కంట్రోల్ రూమ్ ల నుంచి నుంచి ఫీల్డ్ సిబ్బంది వరకు ప్రతి ఒక్కరి కృషితోనే ఈ విజయాన్ని సాధించామని చెప్పారు.
జాతీయ స్థాయిలో తెలంగాణ ప్రతిభ
18,139 మెగావాట్ల గరిష్ట డిమాండ్తో తెలంగాణ రాష్ట్రం, సుమారు 19,900 మెగావాట్ల గరిష్ట డిమాండ్ను నమోదు చేసిన మధ్యప్రదేశ్, అలాగే 19,600–20,600 మెగావాట్ల మధ్య గరిష్ట డిమాండ్ నమోదైన రాజస్ధాన్ వంటి పెద్ద రాష్ట్రాలకు సమానంగా నిలిచింది అన్నారు. భూభాగం, జనాభా పరంగా చిన్నదైనా తెలంగాణ తన సామర్థ్యాన్ని చాటింది అన్నారు. అదే విధంగా పంజాబ్, హర్యానా, ఝార్ఖండ్, ఛత్తీస్గఢ్ వంటి పారిశ్రామిక రాష్ట్రాల కంటే ఎక్కువ గరిష్ట డిమాండ్ను తెలంగాణ నమోదు చేసిందనీ భట్టి ఆ ప్రకటనలో పేర్కొన్నారు. తెలంగాణ భౌగోళికంగా చిన్నదైనా, అధిక విద్యుత్ వినియోగ సాంద్రత కలిగిన రాష్ట్రంగా నిలుస్తోందని వెల్లడించారు. ఐటీ, ఔషధ తయారీ, తయారీ రంగం, సాగునీటి విస్తరణ వంటి రంగాల్లో వేగవంతమైన వృద్ధి దీనికి ప్రధాన కారణం అని డిప్యూటీ సీఎం వివరించారు.
వేగవంతమైన డిమాండ్ పెరుగుదల
తెలంగాణ రాష్ట్రంలో విద్యుత్ డిమాండ్ పెరుగుదల స్పష్టంగా కనిపిస్తోంది అన్నారు.
2023-24:
గరిష్ట డిమాండ్15,623 మెగావాట్లు (08.03.2024)
* 2024–25 గరిష్ట డిమాండ్: 17,162 మెగావాట్లు(20.03.2025)
* 2025–26 (మునుపటి గరిష్టం): 17,162 మెగావాట్లు
* 2026 (ప్రస్తుతం): 18,139 మెగావాట్లు(03.03.2026) – కొత్త గరిష్ట దశలోకి ప్రవేశించామని వివరించారు.