నేటి నుంచి యాదగిరిగుట్ట శ్రీ లక్ష్మీ నరసింహ స్వామి వారి వార్షిక బ్రహ్మోత్సవాలు

ముద్ర ప్రతినిధి, భువనగిరి : నేటి నుంచి ఈనెల 28వ తేదీ వరకు యాదగిరిగుట్ట శ్రీ లక్ష్మీ నరసింహ స్వామి వారి వార్షిక బ్రహ్మోత్సవాలు వైభవంగా జరగనున్నాయి. బుధవారం
ఉదయం 10 గంటలకు విష్వక్సేన ఆరాధన, స్వస్తివాచనం, రక్షాబంధనం.
సాయంత్రం మృత్సంగ్రహణం, అంకురారోపణం.19న ఉదయం 8 గంటలకు అగ్ని ప్రతిష్ట ఉదయం 11 గంటలకు ధ్వజారోహణం. సాయంత్రం 6.30 గంటలకు భేరీ పూజ, దేవతా ఆహ్వానం, హవనం నిర్వహిస్తారు. 20న ఉదయం అలంకార, వాహన సేవలకు శ్రీకారం. 9 గంటలకు మత్స్యావతార అలంకార సేవ, వేదపారాయణం. రాత్రి 7 గంటలకు శేష వాహన సేవ.
21న ఉదయం 9 గంటలకు వటపత్రశాయి అలంకార సేవ. రాత్రి 7 గంటలకు హంస వాహన సేవ చేస్తారు.
22న ఉదయం 9 గంటలకు శ్రీకృష్ణ అలంకార సేవ. రాత్రి 7 గంటలకు పొన్న వాహన సేవ.
23న ఉదయం 9 గంటలకు గోవర్ధన గిరిధారి అలంకార సేవ.రాత్రి 7 గంటలకు సింహ వాహన అలంకార సేవ. 24న ఉదయం 9 గంటలకు జగన్మోహిని అలంకార సేవ. రాత్రి 8 గంటలకు అశ్వవాహన సేవ, శ్రీస్వామి వారి ఎదుర్కోలు ఉత్సవం ఘనంగా నిర్వహించనున్నారు.
25న ఉదయం 9 గంటలకు శ్రీరామ అలంకార (హనుమంత వాహనం) సేవ. రాత్రి 8 గంటలకు గజవాహన సేవ.రాత్రి 8.45 గంటలకు శ్రీస్వామి, అమ్మవార్ల తిరుకల్యాణోత్సవం.
26న ఉదయం 9 గంటలకు శ్రీ మహావిష్ణువు అలంకారం, గరుడ వాహన సేవ. రాత్రి 8 గంటలకు దివ్య విమాన రథోత్సవం. 27న ఉదయం 9.30 గంటలకు మహా పూర్ణాహుతి, చక్రతీర్థం. సాయంత్రం 6 గంటలకు శ్రీ పుష్పయాగం, దేవతోద్వాసనం. 28న ఉదయం 10 గంటలకు శ్రీస్వామి వారికి అష్టోత్తర శతఘటాభిషేకం. రాత్రి 9 గంటలకు శ్రీస్వామి వారి డోలోత్సవంతో బ్రహ్మోత్సవాల సమాప్తి అవుతాయి. నేటి నుండి 28వ తేదీ వరకు ఆలయంలో నిర్వహించే ఆర్జిత సేవలు, సుదర్శన నరసింహ హోమం, నిత్య కల్యాణం, శాశ్వత బ్రహ్మోత్సవాలు, మొక్కు జోడు సేవలు తాత్కాలికంగా రద్దు చేశారు.