రాష్ట్ర ఆవిర్భావం రోజు కూడా అబద్దాలేనా

ముద్ర, తెలంగాణ బ్యూరో: రూ.21వేల కోట్ల వడ్డిలేని రుణాలను మహిళలకు ఇచ్చినట్లు సీఎం ఆదారాలు చూపిస్తే తక్షణమే తన ఎంఎల్ఎ పదవికి రాజీనామా చేస్తానని మాజీ మంత్రి, బీఆర్ఎస్ శాసనసభ్యుడు హరీశ్ రావు మరోసారి సవాల్ విసిరారు.  ఆయనకు దమ్ముంటే తన సవాల్ ను స్వీకరించాలని ఛాలెంజ్ విసిరారు.రాష్ట్ర ఆవిర్భావం రోజున కూడా  రేవంత్ రెడ్డి పచ్చి అబద్దాలు చెప్పారని మండిపడ్డారు.రాష్ట్ర అవతరణ వేడుకల్లో భాగంగా సోమవారం శాసనమండలి ప్రతిపక్ష నాయకుడు మధుసూదన చారి, మాజీ మంత్రి సబితా ఇంద్రారెడ్డితో కలిసి హరీశ్‌రావు తెలంగాణ భవన్‌లో జాతీయ జెండాతో పాటు బీఆర్ఎస్ పార్టీ జెండాను ఆవిష్కరించారు.ఈ సందర్భంగా తెలంగాణ తల్లి విగ్రహానికి పూలమాల వేశారు.అనంతరం అమరవీరులకు, ప్రోఫెసర్ జయశంకర్ సార్ విగ్రహానికి నివాళులర్పించారు.అనంతరం తెలంగాణ భవన్‌లో హరీశ్‌రావు మీడియాతో మాట్లాడుతూ, కాంగ్రెస్ ప్రభుత్వం 60వేల ఉద్యోగాలు ఇచ్చినట్లు చెప్పడం సిగ్గుచేటన్నారు.రేవంత్ రెడ్డి  ఇచ్చింది పది వేలు దాటలేదన్నారు.ఉద్యోగాల నోటిఫికేషన్లు ఇచ్చింది పరీక్షలు పెట్టింది కేసీఆర్ హయంలోనే అని అన్నారు. రాష్ట్రంలో  275 లక్షల మెట్రిక్ టన్నుల పంట పండిందని సీఎం గొప్పలు చెబుతున్నారని కానీ అది కేసీఆర్ వల్లే  సాధ్యమైందన్నారు. రేవంత్ ఏడాది పాలనలో కొత్తగా ఒక్క ఎకరాకు నీళ్లు ఇచ్చింది లేదు ఒక్క ప్రాజెక్టు కట్టింది లేదని మండిపడ్డారు. కనీసం ఒక్క చెక్ డ్యాం నిర్మించ లేదని విమర్శించారు.ఒక్క చెరువు తవ్విన దాఖలాలు కూడా లేవన్నారు. కేసీఆర్ పాలనలో పుష్కలంగా రైతులను నీళ్ళు, కరెంట్ ఇచ్చిండు ప్రాజెక్టులు కట్టిండు విత్తనాలు ఇచ్చిండు ధాన్యం కొన్నాడన్నారు. కానీ రేవంత్ పాలనలో చారాణ రుణమాపీ చేసి రైతులను బారాణ ఎగ్గొంటిందని ధ్వజమెత్తారు. వారికి రైతు బంధు లేదు ధాన్యం కొనుగోళ్ల మీద రివ్యూ లేదన్నారు, కానీ అందాల పోటీల మీద రివ్యూలు చేయడం సిగ్గుచేటని వ్యాఖ్యానించారు. గత పంద్రాగస్టు నాడు రుణమాఫీ చేసి తీరుతా అన్నావు ఒక్క ఏడాది కడుపు కట్టుకుంటే రూ. 40వేల కోట్లు కడుతా అన్న రేవంత్ కేవలం రూ. 16వేల కోట్ల మాఫీ చేశాజన్నారు. మరి మిగతా డబ్బు ఎక్కడ పోయిందని ప్రశ్నించారు.  రైతు బందు ఈరోజుకు పడలేదన్నారు.

బీజేపీతో బీఆర్ఎస్ పొత్తు పెట్టుకుంటుందని, కలుస్తదని కొందరు ఏదేదో మాట్లాడుతున్నారని హరీష్‌ రావు పరోక్షంగా కవితకు కౌంటర్ ఇచ్చారు. ఈ విషయమై కేసీఆర్ ఇప్పటికే కుండ బద్దలు కొట్టినట్లు చెప్పారన్నారు. బీఆర్ఎస్ ఏ పార్టీతోనూ పొత్తు పెట్టుకోదని స్పష్టం చేశారు.వచ్చే ఎన్నికల్లో ఒంటరిగా పోటీ చేసి 100 స్థానాల్లో పైగా విజయం సాధించి అధికారంలోకి వస్తామన్నారు. సోషల్ మీడియా యాక్టివిస్టులకు, ఉద్యమకారులకు, బీఆర్ఎస్ కార్యకర్తలకు బీఆర్ఎస్ లీగల్ సెల్ అండగా ఉందని భరోసానిచ్చారు.అక్రమ కేసులు పెట్టి అత్యుత్సాహం ప్రదర్శిస్తున్న అధికారులు జాగ్రత్తగా ఉండాలని హెచ్చరించారు.ఎవరైనా అధికారులు అత్యుత్సాహం ప్రదర్శిస్తున్నారో వారి పేర్లు రెడ్ బుక్ లో రాసి పెట్టాలని బీఆర్ఎస్ నేతలకు సూచించారు.చట్ట విరుద్ధంగా ప్రవర్తించే అధికారులపై తమ ప్రభుత్వం వచ్చిన తర్వాత చర్యలు ఉంటాయని వార్నింగ్ ఇచ్చారు.

సుప్రీంకోర్టుకు వెళ్లి అయినా సరే ఏపీ ప్రభుత్వం కడుతున్న  బనకచర్ల ప్రాజెక్ట్ ను అడ్డుకుంటామని హరీశ్ రావు స్పష్టం చేశారు. బీజేపీ ఎంపీలకు చిత్తశుద్ధి ఉంటే వెంటనే గోదావరి నదిపై బనకచర్ల ప్రాజెక్టును అడ్డుకోవాలని డిమాండ్‌ చేశారు.ఈ ప్రాజెక్టు తెలంగాణకు శాపం కాబోతున్నదన్నారు.అది కడితే గోదావరి జలాల్లో తెలంగాణకు తీవ్ర నష్టం జరుగుతుందని ఆందోళన వ్యక్తం చేశారు. కాంగ్రెస్ దద్దమ్మ ప్రభుత్వానికి కృష్ణాలో మన వాటా వాడుకునే తెలివి లేదని విమర్శించారు.రాష్ట్ర ప్రభుత్వం ఫెయిల్ అయితే బనకచర్ల విషయంలో సుప్రీం కోర్టుకు వెళ్తం, బనకచర్ల ప్రాజెక్టు ఆపుతామన్నారు.నిజంగా తెలంగాణ మీద ప్రేమ ఉంటే కాంగ్రెస్ పార్టీ బనకచర్ల ప్రాజెక్టు ఆపాలని ఈ సందర్భంగా ఆయన డిమాండ్ చేశారు.  రాష్ట్రంలో  రూ.12 వేల కోట్ల ప్రాజెక్టులను కేవలం నలుగురు బడా కాంట్రాక్టర్లకే కట్టబెట్టారని విమర్శించారు.రేవంత్‌ రెడ్డికి సన్నిహితంగా ఉండే ఒక ఎంపీ, ఒక కార్పొరేషన్‌ చైర్మన్‌ మిస్‌ వరల్డ్‌ ఇంగ్లండ్‌ కంటెస్టెంట్‌ మిల్లీ మ్యాగీతో అసభ్యకరంగా ప్రవర్తించారనే వార్తలు వస్తున్నాయని తెలిపారు.దీనిపై వెంటనే సీసీ టీవీ ఫుటేజీ రిలీజ్ చేసి వారిపై చర్యలు తీసుకోవాలని డిమాండ్‌ చేశారు. సచివాలయానికి అంబేద్కర్‌ పేరు పెట్టినందుకు పోలీస్‌ కమాండ్ కంట్రోల్‌ సెంటర్‌లో సమీక్షలు చేస్తున్నారా అని సూటిగా ప్రశ్నించారు.