ముద్ర కూకట్పల్లి : ఓం శాంతి సంస్థ అందిస్తున్న శాంతి, సహనం మరియు ప్రేమ బోధనలు మతాలకు, ప్రాంతాలకు అతీతంగా ప్రపంచ మానవాళికి అనుసరణీయమని టిపిసిసి ఉపాధ్యక్షుడు, కూకట్పల్లి కాంగ్రెస్ ఇంచార్జ్ బండి రమేష్ పేర్కొన్నారు.
ఓం శాంతి సంస్థ కార్యాలయంలో నిర్వహించిన ‘సుప్రీం పీస్ డిజిటల్ వెల్నెస్ విజువల్ మెడిటేషన్ స్పిర్చువల్ సెషన్’ కార్యక్రమానికి ఆయన ముఖ్యఅతిథిగా హాజరయ్యారు. ఈ సందర్భంగా ఆయన మాట్లాడుతూ.. లక్షలాది మంది ఈ సంస్థ ద్వారా మానసిక ప్రశాంతత పొందుతున్నారని కొనియాడారు.రాజస్థాన్లోని మౌంట్ అబూ తర్వాత హైదరాబాద్లో ఈ సంస్థ ఇంతగా విస్తరించడానికి నాటి ముఖ్యమంత్రి నారా చంద్రబాబు నాయుడు స్థల కేటాయింపు, భవన నిర్మాణంలో అందించిన సహకారం మరువలేనిదని గుర్తుచేశారు.
తెలుగు రాష్ట్రాల్లో సంస్థ ఎదుగుదలకు నాటి నుంచి నేటి వరకు అందరు ముఖ్యమంత్రులు తమ వంతు కృషి చేశారని రమేష్ పేర్కొన్నారు.
ఈ కార్యక్రమంలో సంస్థ ప్రతినిధులు కరుణ భాయ్, రాజు భాయ్, కుసుం తో పాటు కాంగ్రెస్ నాయకులు శేరి సతీష్ రెడ్డి, గొట్టిముక్కల వెంకటేశ్వరరావు తదితరులు పాల్గొన్నారు.
