ముద్ర కూకట్పల్లి :
నగరంలోని కూకట్పల్లిలో కలకలం రేపిన కోటి రూపాయల హవాలా నగదు దోపిడీ కేసును పోలీసులు కేవలం 24 గంటల్లోనే ఛేదించారు. ఈ కేసులో ప్రధాన సూత్రధారి మహ్మద్ ఖుస్రోద్దీన్ (A4) సహా నలుగురు నిందితులను పోలీసులు అరెస్ట్ చేశారు. వీరి నుంచి రూ. 77.78 లక్షల నగదు, 5 సెల్ ఫోన్లు మరియు ఒక హోండా యాక్టివాను స్వాధీనం చేసుకున్నారు.
పథకం ప్రకారం దోపిడీ..
పోలీసుల కథనం ప్రకారం.. పాతబస్తీకి చెందిన ఖుస్రోద్దీన్ ‘సిద్రా ఎంటర్ప్రైజెస్’లో ఏసీ టెక్నీషియన్గా పనిచేస్తూ, యజమాని సూచన మేరకు హవాలా నగదును సేకరిస్తుంటాడు. యజమాని చేసేవన్నీ అక్రమ లావాదేవీలని, ఆ డబ్బును కొట్టేసినా పోలీసులకు ఫిర్యాదు చేయలేరని భావించి, తన స్నేహితుడు ఒమర్ షరీఫ్ (A1)తో కలిసి దోపిడీకి స్కెచ్ వేశాడు. మార్చి 17న కూకట్పల్లిలో కోటి రూపాయలు తీసుకుని బాధితులు వస్తుండగా, నిందితులు వారి కళ్లలో మిరపపొడి చల్లి నగదుతో పరారయ్యారు.
దోపిడీ తర్వాత నిందితులు విమానంలో లక్నోకు పారిపోయేందుకు ప్రయత్నించారు. అయితే, సంఘటనా స్థలంలో నిందితులు వదిలేసిన బైక్ ఆధారంగా పోలీసులు చాకచక్యంగా దర్యాప్తు చేపట్టారు. నిందితులు శంషాబాద్ విమానాశ్రయంలో ఉండగా, కూకట్పల్లి డీసీపీ రీతిరాజ్ నేతృత్వంలోని బృందం వారిని అదుపులోకి తీసుకుంది.
అరెస్టయిన వారు మహ్మద్ ఒమర్ షరీఫ్ (A1), మహ్మద్ గౌస్ సద్దాం (A2), అబ్దుల్ హమీద్ (A3), మరియు మహ్మద్ ఖుస్రోద్దీన్ (A4).
ప్రస్తుతం చోటు, సల్మాన్, గౌస్ వంటి మరో ఐదుగురు నిందితులు పరారీలో ఉన్నారు. కేసును వేగంగా ఛేదించిన పోలీస్ బృందాన్ని సైబరాబాద్ పోలీస్ కమిషనర్ ప్రత్యేకంగా అభినందించారు.