ఆంధ్రప్రదేశ్కు శాశ్వత రాజధానిగా అమరావతిని గుర్తించాలంటూ ముఖ్యమంత్రి నారా చంద్రబాబు నాయుడు శాసనసభలో చారిత్రాత్మక తీర్మానం ప్రవేశపెట్టారు. రాజధాని అమరావతికి చట్టబద్ధత కల్పించాలని కేంద్ర ప్రభుత్వాన్ని కోరుతూ ఈ తీర్మానాన్ని సభ ముందు ఉంచారు. రాష్ట్ర సమగ్ర అభివృద్ధి దృష్ట్యా అమరావతిని రాజధానిగా స్పష్టంగా, స్థిరంగా కొనసాగించడం అత్యవసరమని సీఎం అభిప్రాయపడ్డారు.
రాజధాని అంశంపై స్పష్టత, స్థిరత్వం తీసుకురావడానికి రాష్ట్ర విభజన చట్టంలోని సెక్షన్ 5(2)లో అవసరమైన సవరణలు చేయాలని తీర్మానంలో పేర్కొన్నారు. రాజధానికి అవసరమైన అన్ని రక్షణాత్మక చర్యలు తీసుకోవాలన్న దృక్పథంతో ఈ నిర్ణయం తీసుకున్నట్లు తెలిపారు.
ఈ సందర్భంగా శాసనసభలో జరిగిన చర్చలో సీఎం చంద్రబాబు విస్తృతంగా ప్రసంగించారు. అమరావతి ప్రాంతానికి ఉన్న చారిత్రక ప్రాధాన్యతను గుర్తు చేస్తూ, కృష్ణా-గోదావరి నదుల మధ్య ప్రాంతాన్ని శాతవాహనులు పాలించినట్టు పేర్కొన్నారు. బ్రిటిష్ మ్యూజియంలో అమరావతి గ్యాలరీ ఉండటం ఈ ప్రాంత వైభవానికి నిదర్శనమని చెప్పారు.
రాష్ట్ర చరిత్రను ప్రస్తావిస్తూ, మద్రాస్ ప్రెసిడెన్సీ కాలంలో ఆంధ్రులు ఎదుర్కొన్న పరిస్థితులను వివరించారు. పొట్టి శ్రీరాములు త్యాగంతో ఏర్పడిన తొలి భాషా రాష్ట్రం ఆంధ్రప్రదేశ్ అని గుర్తుచేశారు. కర్నూలు, హైదరాబాద్ తర్వాత ఇప్పుడు అమరావతిని రాజధానిగా ఎంచుకున్నామని తెలిపారు.
హైదరాబాద్ అభివృద్ధి విషయంలో తాను తీసుకున్న విజన్ను ప్రస్తావిస్తూ, ఐటీ రంగంలో ముందడుగు వేసి సైబరాబాద్ను నిర్మించినట్లు చెప్పారు. అదే తరహాలో అమరావతిని ప్రపంచ స్థాయి రాజధానిగా తీర్చిదిద్దాలన్న సంకల్పాన్ని వ్యక్తం చేశారు. సింగపూర్ సహకారంతో ప్రణాళికలు రూపొందించామని వెల్లడించారు.
విజయవాడ-గుంటూరు మధ్య రాజధాని ఏర్పాటు చేయాలని శివరామకృష్ణన్ కమిటీ సూచించిన విషయాన్ని గుర్తు చేశారు. అభివృద్ధి వికేంద్రీకరణకు కట్టుబడి రాష్ట్రవ్యాప్తంగా జాతీయ స్థాయి సంస్థలను ఏర్పాటు చేసినట్లు తెలిపారు.
రాజధాని నిర్మాణానికి రైతులు చూపిన సహకారాన్ని ప్రత్యేకంగా ప్రశంసిస్తూ, కేవలం 58 రోజుల్లో 34 వేల ఎకరాల భూమి సమీకరణ జరిగిందని చెప్పారు. భూములు ఇచ్చిన రైతులకు కృతజ్ఞతలు తెలుపుతూ వారికి శిరస్సు వంచి నమస్కరించారు.
రాజధాని అభివృద్ధిని అడ్డుకునే కుట్రలు జరిగాయని ఆరోపిస్తూ, ప్రపంచ బ్యాంక్కు ఫిర్యాదులు పంపించడం వంటి చర్యలు జరిగినట్లు పేర్కొన్నారు. అయినప్పటికీ అమరావతిని పవిత్రమైన మట్టి, నీటితో నిర్మించి శాశ్వతంగా నిలిపే సంకల్పంతో ముందుకు సాగుతున్నామని సీఎం చంద్రబాబు స్పష్టం చేశారు.