నాడు కబ్జాల నిలయం.. నేడు పర్యాటక కేంద్రం: నల్ల చెరువు ప్రారంభోత్సవంలో సీఎం రేవంత్ రెడ్డి
ముద్ర కూకట్పల్లి :
“హైదరాబాద్ నగరాన్ని వరద ముప్పు నుంచి కాపాడటమే మా ప్రభుత్వ ప్రధాన లక్ష్యం. కబ్జాదారుల కోరల్లో చిక్కిన జలవనరులను కాపాడి, ప్రజలకు ఆహ్లాదాన్ని పంచే పర్యాటక కేంద్రాలుగా తీర్చిదిద్దుతాం” అని ముఖ్యమంత్రి రేవంత్ రెడ్డి స్పష్టం చేశారు. కూకట్పల్లి నియోజకవర్గ పరిధిలోని నల్ల చెరువు పునరుద్ధరణ పనులను పూర్తి చేసిన అనంతరం, ఆయన గంగా హారతి ఇచ్చి ఈ సరస్సును ప్రజలకు అంకితం చేశారు.
గతాన్ని గుర్తుచేస్తూ: తాను గతంలో మల్కాజిగిరి ఎంపీగా ఉన్న సమయంలో నిధుల కొరత వల్ల ఈ ప్రాంతాన్ని ఆశించిన స్థాయిలో అభివృద్ధి చేయలేకపోయానని, ఇప్పుడు ముఖ్యమంత్రి హోదాలో ఆ బాధ్యతను పూర్తి చేస్తున్నందుకు గర్వంగా ఉందని సీఎం అన్నారు.
హైడ్రా పై ప్రశంసలు: ఒకప్పుడు 16 ఎకరాలకు కుంచించుకుపోయిన నల్ల చెరువును హైడ్రా కమిషనర్ రంగనాథ్ ఆధ్వర్యంలో కబ్జాల నుంచి విముక్తి కలిగించి, 30 ఎకరాలకు విస్తరించామని తెలిపారు. అక్రమ నిర్మాణాలను తొలగించి, సిల్ట్ తీసివేసి చెరువుకు పూర్వవైభవం తెచ్చిన తీరును ఆయన కొనియాడారు.
లేక్ ఎకానమీ జోన్స్: నగరంలోని చెరువులను కేవలం జలవనరులుగానే కాకుండా, ‘లేక్ ఎకానమీ జోన్లు’గా మారుస్తామని రేవంత్ రెడ్డి ప్రకటించారు. చెరువుల చుట్టూ వాకింగ్ ట్రాక్లు, సైక్లింగ్ ట్రాక్లు, ఓపెన్ జిమ్లతో పాటు మహిళా సంఘాల సభ్యులు పాలు, పండ్లు, కూరగాయలు విక్రయించుకునేలా స్టాళ్లను ఏర్పాటు చేస్తామన్నారు.
నిరుపేదలకు భరోసా: చెరువుల పరిరక్షణ క్రమంలో ఇళ్లు కోల్పోయే పేదవారికి అన్యాయం జరగనివ్వబోమని సీఎం హామీ ఇచ్చారు. బాధితులకు 2BHK ఇళ్లు, తగిన పరిహారం లేదా టీ డి ఆర్ కల్పిస్తామని, రాజకీయాలకు అతీతంగా అభివృద్ధిని ముందుకు తీసుకెళ్తామని చెప్పారు.
ఢిల్లీ ముంబై పరిస్థితులపై హెచ్చరిక: ఢిల్లీలో కాలుష్యం వల్ల స్కూళ్లకు సెలవులిచ్చే పరిస్థితి ఉందని, ముంబైలో చిన్న వర్షానికే నగరం స్తంభిస్తోందని గుర్తు చేస్తూ.. భవిష్యత్తు తరాల కోసం మూసీ ప్రక్షాళన, చెరువుల పునరుద్ధరణ అనివార్యమని ఆయన నొక్కి చెప్పారు.
రాజకీయాలకు అతీతమైన అభివృద్ధి: “ఎన్నికల సమయంలోనే రాజకీయం ఉండాలి, ఎన్నికల తర్వాత కేవలం అభివృద్ధిపైనే దృష్టి పెట్టాలి” అని అధికారులకు, ప్రజాప్రతినిధులకు దిశానిర్దేశం చేశారు. మల్కాజిగిరి నియోజకవర్గ పరిధిలోని అన్ని అసెంబ్లీ స్థానాలకు సమానంగా నిధులు కేటాయిస్తామని ప్రకటించారు.
నల్ల చెరువు ప్రత్యేకతలు:
చెరువు విస్తీర్ణం 16 ఎకరాల నుండి 30 ఎకరాలకు పెంపు.
వరద నీరు సాఫీగా వెళ్లేందుకు 8 ఇన్లెట్ల ఏర్పాటు.
మురుగునీరు చేరకుండా డైవర్షన్ పనులు పూర్తి.
వాకింగ్ ట్రాక్, సైక్లింగ్ ట్రాక్ మరియు చిన్నారుల కోసం ప్లే ఏరియాల ఏర్పాటు.
ఈ కార్యక్రమంలో మంత్రులు, ఎమ్మెల్యేలు, హైడ్రా కమిషనర్ రంగనాథ్ మరియు పెద్ద సంఖ్యలో స్థానిక ప్రజలు పాల్గొన్నారు.