ముద్ర ప్రతినిధి, నాగర్ కర్నూల్:
ప్రజల ఆరోగ్య సంరక్షణలో ప్రభుత్వ ఆసుపత్రులు కీలక పాత్ర పోషించాల్సిన అవసరం ఉందని జిల్లా కలెక్టర్ బాదావత్ సంతోష్ పేర్కొన్నారు. అచ్చంపేట నియోజకవర్గ పరిధిలోని మన్ననూరు ప్రభుత్వ ప్రాథమిక ఆరోగ్య కేంద్రాన్ని మంగళవారం ఆయన ఆకస్మికంగా తనిఖీ చేశారు.
ఈ సందర్భంగా ఆసుపత్రి పనితీరు, వైద్య సేవల అందుబాటు, రోగులకు అందుతున్న సదుపాయాలపై సమగ్రంగా పరిశీలన జరిపారు. ముందుగా డాక్టర్లు, ఇతర వైద్య సిబ్బంది హాజరు రిజిస్టర్ను పరిశీలించి, సమయపాలన మరియు విధి నిర్వహణపై ప్రత్యేక దృష్టి సారించారు.
ఆసుపత్రికి వచ్చిన రోగులతో నేరుగా మాట్లాడి, వారికి అందుతున్న వైద్య సేవల నాణ్యతపై అభిప్రాయాలు సేకరించారు. వారు ఎలాంటి సమస్యలతో వచ్చారో, చికిత్స ఎలా అందుతోంది, సంతృప్తి స్థాయి ఎలా ఉందో వివరంగా అడిగి తెలుసుకున్నారు.
పీహెచ్సీలో రోజువారీ అవుట్ పేషెంట్ల (ఓపీ) సంఖ్యపై వివరాలు తెలుసుకొని, ప్రతి రోగి వివరాలను ఆన్లైన్లో నమోదు చేయాలని, ఇచ్చే చికిత్స మరియు మందుల వివరాలు సక్రమంగా నమోదు చేయాలని వైద్య సిబ్బందికి ఆదేశించారు. రికార్డు నిర్వహణలో నిర్లక్ష్యం ఉండకూడదని హెచ్చరించారు.
తదుపరి ల్యాబొరేటరీ, మెడికల్ స్టోర్, లేబర్ రూమ్ వంటి విభాగాలను పరిశీలించి, పరికరాలు, ఔషధాల నిల్వ, పరిశుభ్రత పరిస్థితులను సమీక్షించారు. లేబర్ రూమ్లో సదుపాయాలపై విచారించి, గత నెలలో జరిగిన ప్రసవాల వివరాలను అధికారుల నుంచి తెలుసుకున్నారు.
ఈ సందర్భంగా కలెక్టర్ మాట్లాడుతూ ప్రభుత్వ ఆసుపత్రుల్లో ప్రజలకు నాణ్యమైన వైద్య సేవలు అందించడం అత్యంత ప్రాధాన్యత కలిగిన అంశమని తెలిపారు. డాక్టర్లు, వైద్య సిబ్బంది ఎప్పటికప్పుడు అందుబాటులో ఉండి రోగులకు మెరుగైన సేవలు అందించాలని సూచించారు. రోగుల పట్ల మానవత్వంతో వ్యవహరించి, సమయానుకూలంగా చికిత్స అందించడం ప్రతి ఒక్కరి బాధ్యత అని స్పష్టం చేశారు.
ఆసుపత్రి నిర్వహణలో ఎలాంటి లోపాలు తలెత్తకుండా అధికారులు క్రమం తప్పకుండా పర్యవేక్షణ కొనసాగించాలని ఆదేశించారు. ప్రభుత్వ ఆరోగ్య కేంద్రాలపై ప్రజల్లో విశ్వాసం పెంపొందించేలా కృషి చేయాలని సూచించారు.
కలెక్టర్ వెంట ఐటిడిఏ మేనేజర్ జాఫర్ హుస్సేన్, వైద్యులు, ఇతర అధికారులు, గ్రామ సర్పంచ్ ఇస్లావత్ మంజుల రాజారం తదితరులు పాల్గొన్నారు.
మొక్కజొన్న కొనుగోలు కేంద్రాలను రైతులు సద్వినియోగం చేసుకోవాలి – కలెక్టర్ బాదావత్ సంతోష్
నాగర్ కర్నూలు జిల్లా అచ్చంపేట పరిధిలోని దేవదారికుంట తండా వద్ద ఏర్పాటు చేసిన మొక్కజొన్న కొనుగోలు కేంద్రాన్ని జిల్లా కలెక్టర్ బాదావత్ సంతోష్ మంగళవారం ఆకస్మికంగా సందర్శించారు. ఈ సందర్భంగా కేంద్రంలో జరుగుతున్న కొనుగోలు ప్రక్రియను సమగ్రంగా సమీక్షించారు.
కేంద్రానికి వచ్చిన రైతులతో నేరుగా మాట్లాడిన కలెక్టర్, వారి సమస్యలను తెలుసుకుని, కొనుగోలు ప్రక్రియలో ఎలాంటి ఇబ్బందులు ఉన్నా నేరుగా తన దృష్టికి తీసుకురావాలని సూచించారు.
రైతులు ఎదుర్కొంటున్న ఇబ్బందులపై స్పందించిన కలెక్టర్, కొనుగోళ్లు ఎటువంటి ఆలస్యం లేకుండా పారదర్శకంగా నిర్వహించాలని సంబంధిత అధికారులకు స్పష్టమైన ఆదేశాలు జారీ చేశారు. ప్రభుత్వం నిర్ణయించిన మద్దతు ధర ₹2400 రైతులకు పూర్తి స్థాయిలో అందేలా చర్యలు తీసుకోవాలని పేర్కొన్నారు.
మొక్కజొన్న పంటలో తేమ శాతం 14 శాతం లోపు ఉండేలా సిద్ధం చేసుకోవాలని రైతులకు అవగాహన కల్పించారు. తేమ శాతం అధికంగా ఉంటే ధర తగ్గే అవకాశాలు ఉన్నందున జాగ్రత్తలు పాటించాలని సూచించారు. పంట నాణ్యతపై ప్రత్యేక దృష్టి సారించాలని తెలిపారు.
కేంద్రంలో తూకం, నిల్వ, రవాణా వంటి ఏర్పాట్లు సక్రమంగా ఉండేలా చూసుకోవాలని అధికారులను ఆదేశించారు. రైతులకు ఎలాంటి ఇబ్బందులు కలగకుండా తాగునీరు, నీడ, కూర్చునే సౌకర్యాలు కల్పించాలని, అవసరమైతే అదనపు సిబ్బందిని నియమించి కొనుగోళ్లను వేగవంతం చేయాలని సూచించారు.
ఈ కార్యక్రమంలో అచ్చంపేట ఆర్డీఓ యాదగిరి, తహసీల్దార్ సైదులు, ప్రాథమిక వ్యవసాయ సహకార సంఘం (పీఏసీఎస్) సీఈఓ కొమ్ము ఎల్లయ్య, ఆర్ఐ బలరాం, శివ, పీఏసీఎస్ మల్లేష్, రైతులు మరియు ఇతర అధికారులు పాల్గొన్నారు.