ముద్ర కూకట్పల్లి :
తమిళనాడు, కేరళ రాష్ట్రాల్లో అత్యంత వైభవంగా జరుపుకునే అయ్యప్ప స్వామి జయంతి (పంగుని ఉత్తిరం) వేడుకలు బుధవారం కూకట్పల్లిలోని అయ్యప్ప స్వామి దేవస్థానంలో అత్యంత భక్తిశ్రద్ధలతో జరిగాయి. శబరిమలలో బ్రహ్మోత్సవాల ముగింపు పర్వదినం కావడంతో, ఇక్కడ కూడా ఆలయం భక్తులతో కిక్కిరిసిపోయింది.ఈ వేడుకలను పురస్కరించుకొని దేవస్థానం చైర్మన్ వడ్డేపల్లి రాజేశ్వరరావు ప్రత్యేక పూజా కార్యక్రమాల్లో పాల్గొన్నారు. అర్చక స్వాముల పర్యవేక్షణలో స్వామివారికి నిర్వహించిన అభిషేకం, అర్చన, హారతుల్లో ఆయన పాల్గొని మొక్కులు తీర్చుకున్నారు.ఈ సందర్భంగా రాజేశ్వరరావు మాట్లాడుతూ.. అయ్యప్ప స్వామి జయంతి నియమానికి, ధర్మానికి, మరియు నిరుపమ భక్తికి నిదర్శనమని పేర్కొన్నారు.
”పంగుని ఉత్తిరం పర్వదినం మనలోని దైవత్వాన్ని మేల్కొలిపే పవిత్ర ఘడియ. అయ్యప్ప స్వామి ఆశీస్సులతో సమాజంలో శాంతి, సౌభ్రాతృత్వం వర్ధిల్లాలని, అందరికీ అభివృద్ధి కలగాలని ప్రార్థించాను” అని ఆయన తెలిపారు.
ఈ కార్యక్రమంలో ఆలయ కమిటీ సభ్యులు మరియు పెద్ద సంఖ్యలో అయ్యప్ప భక్తులు పాల్గొని స్వామివారి కృపాకటాక్షాలను అందుకున్నారు.
