రాజకీయాల్లో సెగలు పుట్టించే వేసవి ఎండల వేళ.. రాష్ట్ర రాజకీయాల్లో ఒక చల్లని, అపూర్వ దృశ్యం ఆవిష్కృతమైంది. మల్కాజ్గిరి ఎంపీ ఈటల రాజేందర్, హర్యానా మాజీ గవర్నర్ బండారు దత్తాత్రేయ ఒకే చోట కలిసి తాటి ముంజలను ఆస్వాదిస్తూ సందడి చేశారు.
అనుకోని అతిథి.. ఆత్మీయ పలకరింపు
తన మల్కాజిగిరి పార్లమెంట్ నియోజకవర్గ పర్యటనలో భాగంగా వెళ్తున్న ఎంపీ ఈటల రాజేందర్, మార్గమధ్యలో తాటి ముంజల బండి కనిపించగానే వాహనం ఆపారు. తన అనుచరులతో కలిసి ప్రకృతి ప్రసాదించిన ఆ వేసవి ఫలాలను రుచి చూస్తుండగా అదే దారిలో వెళ్తున్న సీనియర్ నేత బండారు దత్తాత్రేయ కారు అక్కడ ఆగింది.
పాత మిత్రుడు, పెద్దన్న దత్తాత్రేయను చూడగానే ఈటల ఎంతో ఆప్యాయంగా పలకరించారు. “అన్నా.. ముంజలు తింటావా!” అంటూ ఆయన సరదాగా ఆహ్వానించిన తీరు అక్కడున్న వారి ముఖాల్లో చిరునవ్వులు పూయించింది. ఇద్దరు అగ్రనేతలు హోదాలను పక్కన పెట్టి, సామాన్యుల మధ్య రోడ్డు పక్కనే నిలబడి ముంజలను ఆస్వాదించడం విశేషం.
గౌడన్నల కష్టాలపై ఆరా
కేవలం ముంజలు తినడమే కాకుండా, అక్కడ విక్రయిస్తున్న గౌడ సోదరులతో ఈటల రాజేందర్ ప్రత్యేకంగా మాట్లాడారు. ఈ సీజన్లో వారి వృత్తి ఎలా సాగుతోంది, చెట్లు ఎక్కేటప్పుడు ఎదురవుతున్న ఇబ్బందులేమిటి, గిరాకీ ఎలా ఉంది అన్న విషయాలను ఆత్మీయంగా అడిగి తెలుసుకున్నారు.
ఒక ఎంపీ హోదాలో ఉన్నా సరే, రోడ్డు పక్కన ఆగి ముంజలు తింటూ సామాన్య ప్రజలతో మమేకమవ్వడం ఈటల రాజేందర్ గారి ప్రత్యేకతను చాటింది. ఇద్దరు సీనియర్ నాయకులు ఎంతో నిరాడంబరంగా ఒకే చోట కలిసి సమయాన్ని గడపడం శ్రేణుల్లో కొత్త ఉత్సాహాన్ని నింపింది.
“పెద్ద పదవుల్లో ఉన్నా సరే, పాత బంధాలను మర్చిపోకుండా, సామాన్య ప్రజలతో కలిసి ఇలా సమయం గడపడం ఈ నేతల సంస్కారానికి నిదర్శనం.” అని స్థానికులు చర్చించుకుంటున్నారు.
ఈ ఆత్మీయ భేటీకి సంబంధించిన ఫోటోలు ప్రస్తుతం సోషల్ మీడియాలో వైరల్ అవుతున్నాయి. రాజకీయ విభేదాల కంటే మానవీయ సంబంధాలే మిన్న అని ఈ దృశ్యం నిరూపించింది.