ముద్ర, జోగుళాంబ గద్వాల ప్రతినిధి:
మెగా లోక్ అదాలత్ కార్యక్రమం సందర్భంగా ఈ శనివారం (మార్చి 28) తెలంగాణ రాష్ట్ర హైకోర్టు గౌరవ న్యాయమూర్తులు శ్రావణ్ కుమార్, షాంకోషి జోగుళాంబ గద్వాల్ జిల్లాకు విచ్చేయడం జరిగింది. వారి రాకతో జిల్లా న్యాయ సేవలకు మరింత ప్రాధాన్యత ఏర్పడింది.
ఈ సందర్భంగా టెన్త్ బెటాలియన్ గెస్ట్ హౌస్ వద్ద జిల్లా ఎస్పీ టి. శ్రీనివాసరావు గౌరవ న్యాయమూర్తులను మర్యాదపూర్వకంగా ఆహ్వానించి పుష్పగుచ్ఛం అందజేసి సత్కరించారు. ఈ కలయిక సౌహార్ద వాతావరణంలో జరిగి, న్యాయ వ్యవస్థ మరియు పోలీస్ శాఖల మధ్య ఉన్న సమన్వయాన్ని ప్రతిబింబించింది.
అనంతరం గౌరవ హైకోర్టు న్యాయమూర్తులు పోలీస్ గౌరవ వందనం స్వీకరించడం కార్యక్రమానికి ప్రత్యేక ఆకర్షణగా నిలిచింది. ఈ సందర్భంగా పోలీస్ సిబ్బంది క్రమశిక్షణతో నిర్వహించిన గౌరవ వందనం అందరినీ ఆకట్టుకుంది.
మెగా లోక్ అదాలత్ ద్వారా పెండింగ్లో ఉన్న కేసుల త్వరితగతిన పరిష్కారం, ప్రజలకు సులభంగా న్యాయం అందించడం ప్రధాన లక్ష్యంగా కొనసాగుతున్న ఈ కార్యక్రమం జిల్లా ప్రజలకు ఎంతో ఉపయోగకరంగా నిలుస్తోంది.