పసిమొగ్గలపై దారుణాలు..
ముద్ర వార్తలు 
- ఐదేళ్ల బాలికపై అత్యాచారం, హత్య
- ఆలస్యంగా వెలుగులోకి ఘటన
కేరళ: పసిమొగ్గలపై వరుస దారుణాలు దేశంలో ఆగడం లేదు. కేరళలో ఓ బాలికపై అత్యాచార ఘటన ఒకరోజు ఆలస్యంగా వెలుగుచూసింది. ఐదేళ్ల బాలికపై వలస కార్మికుడు మద్యం మత్తులో అత్యాచారం చేయడమే కాకుండా గొంతునులిమి దారుణంగా చంపేశాడు. శుక్రవారం ఈ ఘటన జరగ్గా, బాలిక ఆచూకీ కోసం అంతటా వెతికిన తల్లిదండ్రులు శనివారం ఉదయం పోలీసులకు ఫిర్యాదు చేశారు. అనంతరం పోలీసుల దర్యాప్తులో పలు కీలక విషయాలు తెలిశాయి. దర్యాప్తు అనంతరం ఆదివారం ఎర్నాకులం రూరల్ ఎస్పీ వివేక్ కుమార్ ఈ ఘటనకు సంబంధించిన విషయాలను మీడియాకు వెల్లడించారు. బీహార్కు చెందిన ఓ కుటుంబం ఎర్నాకులంలో కూలీ పనులు చేసుకుంటోంది. ఆ దంపతుల ఐదేళ్ల కుమార్తె శుక్రవారం నుంచి కనిపించకుండా పోయిందని ఫిర్యాదు చేసినట్లు తెలిపారు. సీసీ ఫుటేజీని పరిశీలించి బీహార్ కార్మికుడు అస్పాక్ అస్లాంను అదుపులోకి తీసుకున్నామన్నారు. అతను బాగా తాగి ఉన్నందువల్ల వెంటనే వివరాలు రాబట్టలేకపోయామన్నారు. మత్తువదిలాక అతన్ని విచారించగా బాలికపై అత్యాచారం జరిపి గొంతునులిమి హత్య చేసి గోనె సంచిలో ఉంచి పడవేశాడని అంగీకరించాడన్నారు. ఈ ఘటనకు సంబంధించి నిందితుడి నుంచి మరిన్ని విషయాలు రాబడుతున్నట్లు ఎస్పీ వివేక్ కుమార్ స్పష్టం చేశారు.
