AI వార్ కమాండర్ ను సృష్టించిన చైనా

బీజింగ్: యుద్ధం కోసం శిక్షణ ఇవ్వడానికి, పెద్ద ఎత్తున కంప్యూటర్ వార్ గేమ్‌లను ఆదేశించడానికి చైనా ప్రపంచంలోనే మొట్టమొదటి AI కమాండర్‌ను సృష్టించింది. హెబీ ప్రావిన్స్‌లోని షిజియాజువాంగ్‌లోని నేషనల్ డిఫెన్స్ యూనివర్శిటీ జాయింట్ ఆపరేషన్స్ కాలేజ్‌లో డెవలప్ చేసిన ఈ “వర్చువల్ కమాండర్” మానవ అనుభవాన్ని, ఆలోచనా విధానాలు, వ్యక్తిత్వ లక్షణాలు, మానవ లోపాలను కూడా అనుకరిస్తూ, సాధ్యమైనంత మేరకు మనిషిలానే ఉండేలా రూపొందించారు. సైనిక బలగాలపై ఆర్టిఫిషియల్ ఇంటిలిజెన్స్ నియంత్రణ సాధించకుండా నిరోధించే కఠినమైన నిబంధనలు ఉన్నప్పటికీ, ఈ ఆవిష్కరణ చైనా సైనిక సాంకేతికతలో చెప్పుకోదగిన పురోగతిని సూచిస్తోంది.

ఈ "వర్చువల్ కమాండర్" వీలైనంత వరకు మానవునిలా ఉండేలా రూపొందించారు. సౌత్ చైనా మార్నింగ్ పోస్ట్ కథనం ప్రకారం, ఈ AI కేవలం మానవ అనుభవం, ఆలోచనా విధానాలను అనుకరించదు. ఇది వ్యక్తిత్వ లక్షణాలను, మానవ లోపాలను కూడా ప్రతిబింబిస్తుంది. కానీ ప్రస్తుతానికి, ఇది కచ్చితంగా ల్యాబ్‌కు పరిమితం చేయబడింది.

పీపుల్స్ లిబరేషన్ ఆర్మీ (PLA) యొక్క అన్ని శాఖలతో కూడిన పెద్దస్థాయి కంప్యూటర్ వార్ గేమ్‌ల సమయంలో, AI కమాండర్ సుప్రీం కమాండర్ పాత్రను పోషిస్తుంది. ఈ డిజిటల్ యుద్ధాలలో ప్రధాన నిర్ణయాలు తీసుకునే అధికారం, అది ఎదుర్కొనే ఎప్పటికప్పుడు మారుతున్న దృశ్యాలను త్వరగా నేర్చుకోవడం మరియు స్వీకరించడం చేస్తుంది.

ల్యాబ్‌లో AI కమాండర్ స్వతంత్రంగా పనిచేస్తాడు. మనిషి అవసరం  లేకుండానే నిర్ణయాలు తీసుకుంటాడు. ఈ AI అనుభావిక జ్ఞానాన్ని ఉపయోగిస్తూ గత దృశ్యాలను గుర్తుంచుకుంటుంది. ఆ జ్ఞాపకశక్తి ఆధారంగా సమర్థవంతమైన ప్రణాళికలను త్వరగా రూపొందిస్తుంది. మానవుల మతిమరుపును అనుకరించటానికి వీలుగా శాస్త్రవేత్తలు దాని మెమరీ సామర్థ్యాన్ని పరిమితం చేశారు. అంటే కొత్త డేటా వచ్చినప్పుడు కొంత పాత సమాచారం ప్రక్షాళన అవుతుందని చెబుతున్నారు. AI కమాండర్ అభివృద్ధి ఒక ముఖ్యమైన మైలురాయిగా చెబుతున్నారు. AI సాంకేతికత అభివృద్ధి చెందుతూనే ఉన్నందున, మానవ, AI కమాండ్‌ల మధ్య సరైన సమతుల్యతను కనుగొనడం భవిష్యత్ పరిశోధన, విధాన అభివృద్ధికి ఇది దోహదపడుతుందని భావిస్తున్నారు.