ప్రమాదంలో 186 అమెరికా బ్యాంకులు..!
ముద్ర వార్తలు 
రోజుల వ్యవధిలో అమెరికాలో రెండు బ్యాంకులు కుప్పకూలడంతో ఆర్థికవేత్తల దృష్టి బ్యాంకింగ్ రంగంపై పడింది. ఈ నేపథ్యంలో అమెరికా బ్యాంకింగ్ వ్యవస్థపై జరిగిన అధ్యయనంలో సంచలన విషయాలు వెలుగులోకి వచ్చాయి. ప్రస్తుతం 186 అమెరికా బ్యాంకులు రిస్క్‌లో ఉన్నట్టు తేలింది. వడ్డీ రేట్ల పెరుగుదల, అధికశాతం డిపాజిట్లకు ఇన్సూరెన్స్ లేకపోవడంతో బ్యాంకులు కుప్పకూలే ప్రమాదం ఎదుర్కొంటున్నాయి. సోషల్ సైన్స్ రీసెర్చ్ నెట్వవర్క్ స్టడీ అనే సంస్థ అమెరికా బ్యాంకులపై ఈ అధ్యయనం చేసింది. ఇన్సూరెన్స్ రక్షణ లేని డిపాజిటర్లలలో ఇప్పటికిప్పుడు సగం మంది తమ నిధులను విత్‌డ్రా చేసుకుంటే దాదాపు 190 బ్యాంకులు ప్రమాదంలో పడతాయి. అంతేకాకుండా.. ఇన్సూరెన్స్ ఉన్న డిపాజిట్లపైనా ఈ ప్రభావం పడుతుంది. 300 బిలియన్ డాలర్ల మేర రిస్క్ ఏర్పడుతుంది’’ అని సదరు సంస్థ తన నివేదికలో పేర్కొంది. ఇక బ్యాంకింగ్ డిపాజిటర్లలో ఆందోళన మిన్నంటితే మరిన్ని బ్యాంకులు కుప్పకూలే స్థితి వస్తుందని హెచ్చరించింది. సోషల్ సైన్స్ అధ్యయనం జరిపిన బ్యాంకుల్లో అధికశాతం తమ ఆస్తులను గవర్న్‌మెంట్స్ బాండ్స్, మార్ట్‌గేజ్ ఆధారిత సెక్యూరిటీల్లోకి మళ్లించాయి. వీటి విలువ అమెరికా కేంద్ర బ్యాంకు ఫెడరల్ రిజర్వ్(ఫెడ్) వడ్డీ రేట్లపై ఆధారపడి ఉంటుంది. ఇటీవల ఫెడ్ వడ్డీ రేట్లు పెంచడంతో ఈ ఆస్తుల విలువ పడిపోయి బ్యాంకింగ్ రంగాన్ని ప్రమాదంలోకి నెట్టింది. వడ్డీ రేట్ల పెరుగుదలకు మొదటగా బలయింది సిలికాన్ వ్యాలీ బ్యాంక్ అని నిపుణులు చెబుతున్నారు. దీర్ఘకాలిక ప్రభుత్వ బాండ్లలో పెట్టుబడి పెట్టిన ఈ బ్యాంకుకు వడ్డీ రేట్ల పెంపు శరాఘాతంగా మారింది.
