సైక్లింగ్లో తగ్గేదేలే..
sharma 
- మనిషై పుట్టినవాడు కారాదు మట్టిబొమ్మా...
- పట్టుదలే వుంటే కాగలడు మరో బ్రహ్మ..
- కృషి ఉంటే మనుషులు ఋషులౌతారు..
- మహాపురుషులౌతారు...
- తరతరాలకి తరగని వెలుగౌతారు..
- అన్నాడో సినీ కవి..
ఈ మాటలను నిజం చేస్తూ నేటి యువత తమదైన రంగంలో దూసుకుపోతున్నారు. అలాంటి కోవలో మొదటిగా నిలుస్తాడు తెలంగాణ బిడ్డ దేవాన్ష్. బిఎంఎక్స్ సైక్లింగ్రేసింగ్లో విశేష ప్రతిభ కనబరుస్తూ.. ప్రపంచ ఛాంపియన్షిప్లో రెండుసార్లు అవకాశం సంపాదించుకున్నాడు. అటు సైక్లింగ్లోనూ, ఇటు చదువులోనూ ముందుండటమే కాకుండా సోషల్ సర్వీస్ వంటి వాటిలో తనదైన ముద్ర వేసి ముందుకు సాగుతూ ఆల్రౌండర్ అనిపించుకుంటున్నాడు దేవాన్ష్.
వివరాల్లోకి వెళితే..
దేవాన్ష్ది యాదాద్రి, భువనగిరి జిల్లాలోని పులిగిల్ల గ్రామం. కొలను కమలాకర్ రెడ్డి, జ్యోతిలు అతని తల్లిదండ్రులు. వీరు దేవాన్ష్ చిన్నతనంలోనే ఐర్లాండ్లో స్థిరపడ్డారు. ప్రస్తుతం ఐర్లాండ్లోని డబ్లిన్లోని సెంట్విన్సెంట్ క్యాస్సేల్నాక్ కాలేజీలో ఏడో తరగతి చదవుతున్న దేవాన్ష్ క్రీడలతో పాటు చదువులోనూ మంచి మార్కులతో ఉత్తీర్ణత సాధిస్తున్నాడు. ఇతను చాలా బ్రిలియంట్.. పాఠశాల విద్యలో ఎప్పుడూ మొదటి స్థానమే.. అంతేకాదు ఒకరికి సాయం చేయడంలోనూ, సోషల్ వర్క్లోనూ, ఆటపాటల్లోనూ ఎప్పుడూ ముందంజలో ఉంటాడు. కరోనా పాండమిక్ సమయంలో, ఎక్కడికీ వెళ్లలేని పరిస్థితుల్లో తమ కుటుంబంతో కలిసి పిక్నిక్కు వెళ్లాడు దేవాన్ష్. అదో క్లబ్.. అక్కడ అతను సైక్లింగ్ ట్రాక్ చూశాడు. దాన్ని చూసి దేవాన్ష్కు సైక్లింగ్ చేయాలనే ఉత్సాహం కలిగింది. ఇదే విషయాన్ని తండ్రికి చెప్పాడు. ఈ విషయాన్ని తండ్రి సీరియస్గా తీసుకుని దేవాన్ష్ను ప్రోత్సహించాడు. అప్పటికి దేవాన్ష్ వయసు పది సంవత్సరాలు.
మరుసటిరోజు దేవాన్ష్ తండ్రి కమలాకర్.. ఆ క్లబ్ట్రాక్ ఛైర్మన్ జాన్ఒ రైలీతో మాట్లాడారు. అతను దేవాన్ష్ను ట్రాక్ టెస్ట్ చేశాడు. అది దేవాన్ష్కు చాలా నచ్చింది.. బీఎంఎక్స్ సైక్లింగ్ బాగా చేశాడు. ఇది జరిగిన మూడు రోజుల్లోనే లూకస్ క్లబ్ రేస్లో పాల్గొన్నాడు దేవాన్ష్.. అంతే.. ఇక వెనుదిరిగి చూడలేదు. అదే లూకస్బిఎంఎక్స్ క్లబ్ ద్వారా శిక్షణ తీసుకుని.. తనదైన శైలిలో దూసుకుపోవడం మొదలుపెట్టాడు. కేవలం 36 నెలల్లోనే రెండుసార్లు ప్రపంచ ఛాంపియన్షిప్లలో పాల్గొన్నాడు. 400 మీటర్ల పొడవైన ఎగుడు దిగుడు ట్రాక్లో స్టార్టింగ్ హిల్ పాయింట్ నుండి.. ఫినిషింగ్ లైన్ వరకూ ఎంతో శక్తిని కూడగట్టుకుని సైక్లింగ్ చేయాల్సి ఉంటుంది. దీనిలో గెలవాలంటే 34 సెకన్లలో 400 మీటర్ల పొడవైన ట్రాక్ను ఛేదించాల్సి ఉంటుంది. దేవాన్ష్ రెండో ప్రయత్నంలోనే 37 సెకన్లలో తన రేస్ను పూర్తిచేశాడు. ప్రపంచ ఛాంపియన్షిప్ను కైవసం చేసుకోవాలంటే దేవాన్ష్ మరో మూడు సెకన్ల ముందుగానే సైక్లింగ్ పూర్తిచేయాల్సి ఉంటుంది. ఇప్పుడు దేవాన్ష్, శిక్షణ తీసుకుంటూ.. పట్టుదలగా ఆ ప్రయత్నంలోనే ఉన్నాడు. 50 దేశాల నుండి ప్రాతినిధ్యం వహిస్తోన్న 112 మంది సైక్లిస్ట్లతో దేవాన్ష్తలబడుతున్నాడు. ఈ పోటీ చాలా క్లిష్టంగా ఉంటుంది.
ప్రతి మిల్లీ సెకండ్ నుకూడా పరిగణనలోకి తీసుకుంటారు. 2024 సంవత్సరంలో ఇప్పటివరకూ నిర్వహించిన ఐర్లాండ్ జాతీయస్థాయి బిఎంఎక్స్పోటీలో రెండోస్థానంలో ఉన్నాడు దేవాన్ష్. 2023లో గ్లాస్కోలో జరిగిన బిఎంఎక్స్రేసింగ్ ప్రపంచ ఛాంపియన్షిప్లో మొదటిసారిగా పొల్గొన్నాడు దేవాన్ష్. అతని ప్రతిభ చూసిన ఐర్లాండ్ ప్రధానమంత్రి ఎంతో ముచ్చట పడ్డాడు.. అభినందనలు తెలిపాడు. అంతేకాదు దేవాన్ష్చూపిస్తోన్న అసాధారణ ప్రతిభను గుర్తించిన ఐర్లాండ్ బీఎంఎక్స్ నిర్వాహకులు, అతనికి జాతీయ స్థాయి బెస్ట్ న్యూకమర్ అవార్డును అందించారు.
డెక్కన్ క్లబ్ ఆఫ్ ఐర్లాండ్ సంస్థ తరఫున యంగ్టాలెంట్ అవార్డును కూడా అందుకున్నాడు దేవాన్ష్. ఇతను సైక్లింగ్లోనే కాదు.. మరిన్ని విషయాల్లో కూడా మేటిగానే ఉన్నాడు. దేవాన్ష్ గతంలో కాన్ఫిడరేషన్ ఆఫ్ ఇండియన్ కమ్యూనిటీస్ ఇన్ ఐర్లాండ్స్టూడెంట్ ఆఫ్ది ఇయర్, డెక్కన్ క్లబ్ఆఫ్ ఐర్లాండ్యంగ్ టాలెంట్ అవార్డు, ఫెడరేషన్ఆఫ్ ఇండియన్ కమ్యూనిటీస్ ఇన్ ఐర్లాండ్తరఫున ఎక్సప్షనల్అచీవ్మెంట్ అవార్డు, స్పిరిట్ ఆఫ్ ద స్కూల్ అవార్డులను అందుకుని.. తనో ఆల్రౌండర్ అని నిరూపించుకున్నాడు. ఇప్పుడు మే 28 నుండి జూన్ 2 వరకు ఇటలీ, వెరొనాలో యుఈసీబీఎం ఎక్స్వారు నిర్వహించే యూరోపియన్ఛాంపియన్షిప్ లో కూడా దేవాన్ష్ స్థానం సంపాదించుకున్నాడు.
ఒత్తిడిని జయిస్తూ..
చిన్న చిన్న పరీక్షలకే ఒత్తిడికి గురవుతుంటాం.. కేవలం కొద్ది నెలల శిక్షణతోనే.. ప్రపంచ ఛాంపియన్షిప్లో పాల్గొనాలంటే ఎంత ఒత్తిడిని ఉంటుందో చెప్పక్కరలేదు.. అలాంటి ఒత్తిడిని తల్లిదండ్రుల సాయంతో జయించేశాడు దేవాన్ష్. మొదట్లో తనతో పోటీపడేవారు ప్రదర్శించే ప్రతిభ చూసి బాగా ఒత్తిడికి గురయ్యేవాడట దేవాన్ష్. వాళ్లలా చేయలేకపోతున్నాను అనేవాడట.. అలాంటి సమయంలో అతని తల్లిదండ్రులు అండగా నిలిచారు. నువ్వు గెలవకపోయినా పర్వాలేదు కానీ.. నీ ప్రయత్నం నువ్వు చెయ్యి.. ఓడిపోతానని సైక్లింగ్ చేయకు.. గెలవడానికి ప్రయత్నించు.. అదీ చాలా జాగ్రత్తగా పూర్తిచెయ్యి.. అంటూ పదే పదే చెప్పేవారు. దాంతో దేవాన్ష్తన ప్రయత్నంపై దృష్టి సారించి.. ఒత్తిడిని జయించేవాడు.
చిన్న చిన్న టార్గెట్స్పెట్టుకుని వాటిని పూర్తి చేసేవాడు.. కానీ జీవితంలో మాత్రం దేవాన్ష్ చాలా పెద్ద టార్గెట్టే పెట్టుకున్నాడు. ఒలంపిక్స్ లో పాల్గొనాలనేది అతని కల అయితే.. భారతదేశ యువతను సైక్లింగ్వైపుగా ప్రోత్సహించాలనేది అతని ఆశయం. జనాభా తక్కువగా ఉండే ఐర్లాండ్వంటి దేశాల్లోనే సైక్లింగ్ విస్తృతంగా ఉంటే.. అత్యంత జనాభా కలిగిన భారతదేశంలో సైక్లింగ్ క్రీడ లేకపోవడం బాధాకరం.. అందుకే ఆ బాధ్యతను తాను నిర్వహించడానికి మొగ్గు చూపుతున్నాడు దేవాన్ష్.. భారతదేశ యువతకి సైక్లింగ్పట్ల అవగాహన పెంచి, ప్రపంచ సైక్లింగ్లో వారు ప్రాతినిధ్యం వహించడానికి మార్గాలను వేయడమే తన ఆశయం అని చెబుతున్నాడు ఈ బుడ్డోడు. చదువుపరంగా ఆటోమొబైల్ ఇంజినీరింగ్ చేయాలనుకున్న దేవాన్ష్.. చిన్నవయసులోనే నిష్కల్మషమైన ఆశయాన్ని తలకెత్తుకున్నాడు.
సౌత్కరోలినాలో జరుగుతున్న ప్రపంచ సైక్లింగ్ పోటీల్లో, ఇంకా ఇటలీలో జరగనున్న యురోపియన్ ఛాంపియన్షిప్లో కూడా ప్రతిభ కనబరచాలని ఇటు సొంత గ్రామ వాసులు, అటు ఐర్లాండ్ వాసులు కోరుకుంటున్నారు. ఏది ఏమైనా అతను అనుకున్న కలలు నెరవేరాలని, మన భారతీయ బిడ్డ ప్రపంచ ఛాంపియన్ షిప్ను సాధించాలని కోరుకుంటూ..
ఆల్ ది బెస్ట్ దేవాన్ష్.
– ఎస్. ఎన్. ఉమామహేశ్వరి
ప్రపంచవ్యాప్తంగా సైక్లింగ్ ఇప్పుడిప్పుడే ప్రాచుర్యంలోకి వస్తోంది. 1969, జూన్ 10న ఒక రేస్గా మొదలై.. ప్రపంచంలోని నలుదిక్కులా విస్తరించింది సైక్లింగ్. ఐర్లాండ్లో సాఫ్ట్వేర్ ఇంజినీర్ గా స్థిరపడ్డ రోస్మాక్లెర్సైక్లింగ్ను ప్రాచుర్యంలోకి తీసుకువచ్చాడు. 1969 కాలిఫోర్నియాలో ఒక పార్కు అటెండెంట్గా పనిచేసిన రోస్ కృషితో ఇది రేసింగ్ పతక క్రీడగా మారింది. దీనికి యునైటెడ్స్టేట్స్కు చెందిన శాంక్షనింగ్బాడీ ద్వారా ధృవీకరణ కూడా లభించింది. అలాంటి సైక్లింగ్పై, భారతదేశ యువతకు అవగాహన కల్పించి.. దానికి ప్రాతినిధ్యం వహించాలనుకుంటున్నాడు దేవాన్ష్. ఒలంపిక్ స్థాయిలో ఉన్న ఈ క్రీడను మన దేశ నలువైపులా విస్తరించాలని.. ఈ క్రీడలో మన భారతదేశ యువత ప్రపంచ పోటీలో ప్రాతినిధ్యం వహించడానికి అందరికీ అవగాహన కల్పించి తన వంతు కృషి చేస్తూ.. పుట్టిన గడ్డ రుణం తీర్చుకోవాలనుకుంటున్నాడు దేవాన్ష్. అతని ఆశయం నెరవేరాలని కోరుకుందాం..
