గ్రూప్–1కు లైన్ క్లియర్
![గ్రూప్–1కు లైన్ క్లియర్](https://mudranews.in/uploads/images/2023/06/image_750x_647ec007d793c.jpg)
- పిటిషన్లు కొట్టేసిన హైకోర్టు
- 11న ప్రిలిమ్స్నిర్వహణకు ఏర్పాట్లు
ముద్ర, తెలంగాణ బ్యూరో : గ్రూప్–1 ప్రిలిమ్స్పరీక్షకు లైన్ క్లియర్ అయ్యింది. ఈ పరీక్షను వాయిదా వేయాలంటూ వేసిన పిటిషన్లను హైకోర్టు కొట్టివేసింది. సోమవారం వీటి మీద విచారణ జరిగింది. గతంలో జరిగిన ప్రిలిమ్స్ పరీక్షను పేపర్ లీకేజీ కారణంగా రద్దు చేసిన విషయం తెలిసిందే. ఇప్పుడు ఈ పరీక్షను టీఎస్పీఎస్సీ నిర్వహించరాదని, ఒకేసారి పలు పరీక్షలు ఉండటం, వరుసగా నియామక పరీక్షలు ఉన్నందున గ్రూప్–1 ప్రిలిమ్స్రద్దు చేయాలంటూ పలువురు హైకోర్టులో పిటిషన్లు దాఖలు చేశారు. టీఎస్పీఎస్సీ కూడా కౌంటర్ దాఖలు చేసింది. పరీక్ష నిర్వహణకు సిద్ధంగా ఉన్నామని, ఈ నెల 11న పరీక్ష నిర్వహిస్తామని తెలిపింది. బెంచ్ దీనిని పరిగణనలోకి తీసుకుని 11న యథాతథంగా పరీక్ష నిర్వహించాలని ఆదేశించింది. గ్రూప్–-1 ప్రిలిమినరీ పరీక్షపై సోమవారం ఉదయం వరకూ సందిగ్ధత నెలకొంది.
సిట్, ఈడీ దర్యాప్తు పూర్తయ్యేదాకా ఈ పరీక్షలను వాయిదా వేయాలంటూ పిటిషనర్లు కోరారు. ఆరోపణలు ఎదుర్కొంటున్న కమిషన్ఈ పరీక్ష నిర్వహించడంపై అభ్యంతరం వ్యక్తం చేశారు. యూపీఎస్సీ లాంటి మూడో సంస్థకు ఈ బాధ్యతను అప్పగించాలని కోరారు. నిరుడు అక్టోబరులో జరిగిన పరీక్షలను రద్దు చేయడంతో పాటు 11న పరీక్షలు నిర్వహిస్తున్నట్లు టీఎస్పీఎస్సీ జారీ చేసిన వెబ్ నోట్ను రద్దు చేయాలని కోరారు. వరుసగా నియామక పరీక్షలు నిర్వహిస్తున్నారని, గ్రూప్–2, 3, 4 పరీక్షలతో సంబంధం లేకుండా, కనీసం 2 నెలల గడువు ఇవ్వకుండా పరీక్షలు నిర్వహిస్తున్నారని మరో రెండు పిటిషన్లు కూడా దాఖలయ్యాయి. వీటిపై జస్టిస్ కాజా శరత్ విచారణ జరిపారు. ఇరు పక్షాల వాదనలు విన్న బెంచ్ ఈ పరీక్షను వాయిదా వేయలేమంటూ అన్ని పిటిషన్లను కొట్టి పారేసింది.
అక్రమాలకు పాల్పడితే కేసులే..
గ్రూప్–1 ప్రిలిమ్స్ పరీక్షకు టీఎస్పీఎస్పీ పూర్తి ఏర్పాట్లు చేస్తున్నది. పరీక్షకు15 నిమిషాల ముందే గేట్లను మూసివేసేందుకు నిర్ణయించింది. అభ్యర్థులు ఎలాంటి అక్రమాలకు పాల్పడినా.. కేసులు నమోదు చేసి, కమిషన్ నిర్వహించే పరీక్షలు రాయకుండా డీబార్ చేస్తామని అధికారులు ప్రకటించారు.