ప్రగతిభవన్ ఇక ప్రజాభవన్
ముద్ర వార్తలు 
- అందులో సామాన్యులందరికీ అనుమతి
- సీపీఐ, సీపీఎం, టీజేఎస్ తో కలిసి పని చేస్తాం
- ప్రతిపక్ష సూచనలూ పరిగణలోకి తీసుకుంటాం
- కాంగ్రెస్ విజయం తెలంగాణ అమరవీరులకు అంకితం
- టీపీసీసీ చీఫ్ రేవంత్రెడ్డి
ముద్ర, తెలంగాణ బ్యూరో :ప్రగతిభవన్ను త్వరలోనే డాక్టర్ బాబాసాహెబ్ అంబేడ్కర్ ప్రజాభవన్ గా మారుస్తామని టీపీసీసీ చీఫ్ రేవంత్ రెడ్డి స్పష్టం చేశారు.గత ప్రభుత్వ పాలనలో మాదిరిగా కాకుండా ఇకపై ప్రగతిభవన్లో సామాన్యులు వచ్చేందుకూ అనుమతి ఉంటుందని పేర్కొన్నారు. ఆదివారం వెలువడిన అసెంబ్లీ ఎన్నికల ఫలితాల్లో స్పష్టమైన మెజార్టీ సాధించిన తర్వాత గాంధీభవన్ లో మీడియాతో మాట్లాడిన రేవంత్ రెడ్డి ఇకపై సచివాలయం గేట్లు అందరి కోసం తెరుచుకుంటాయన్నారు. ఈ ఎన్నికల్లో కాంగ్రెస్కు మద్దతు తెలిపిన సీపీఐ, తెలంగాణ జనసమితి పార్టీలతో పాటు సీపీఎం, ఎంఐఎం పార్టీల సలహాలు సూచనలు తీసుకుని పాలన కొనసాగిస్తామని చెప్పారు. అలాగే ప్రతిపక్ష హోదాలో ఉన్న బీఆర్ఎస్ సూచనలనూ పరిగణలోకి తీసుకుని రాష్ట్రంలో శాంతియుత, ప్రజాస్వామ్య పాలన కొనసాగిస్తామని వివరించారు. కాంగ్రెస్ సాధించిన విజయాన్ని తెలంగాణ ఉద్యమ అమరవీరులకు అంకితమని చెప్పారు. 2009లో సరిగ్గా ఇదే రోజు శ్రీకాంతచారి.. తెలంగాణ కోసం ఆత్మాహుతి చేసుకోగా, ఇప్పుడు ఇదే రోజు కాంగ్రెస్ రాష్ట్రంలో గెలిచిందన్నారు. తెలంగాణలో ప్రజాస్వామ్య పునరుద్ధరణ కోసం కాంగ్రెస్ ప్రయత్నిస్తుందన్నారు. ఎన్నికల ముందు కాంగ్రెస్ ప్రకటించిన గ్యారంటీలు, ఇచ్చిన హామీలను నెరువేరుస్తామన్న ఆయన కాంగ్రెస్ గెలుపునకు కృషి చేసిన పార్టీ శ్రేణులకు కృతజ్ఙతలు తెలిపారు.
