రహదారుల విస్తరణలో 59 శాతం వృద్ధి
sharma 
ఢిల్లీ: గత తొమ్మిదేళ్లలో ప్రభుత్వం చేపడుతున్న అభివృద్ధి పనుల్లో భాగంగా భారతదేశ రోడ్ నెట్‌వర్క్ 59 శాతం వృద్ధి చెంది ప్రపంచంలోనే రెండో అతిపెద్ద దేశంగా మారిందని కేంద్ర మంత్రి నితిన్ గడ్కరీ మంగళవారం తెలిపారు. భారతదేశ రహదారి నెట్‌వర్క్ 2013–-14లో 91,287 కి.మీలండగా, ప్రస్తుతం 1,45,240 కి.మీలకు పెంచామన్నారు. రోడ్ల పెరుగుదలతో ఆయా రాష్ర్టాల కనెక్టివిటీని సులువు చేశామన్నారు. దీని వల్ల వ్యాపార రంగం పుంజుకుందన్నారు. రోడ్ల కనెక్టివిటీ మెరుగుచేయడం వల్ల అనేక ప్రాంతాల్లోని వేగంగా ఫలితాలను అందుకోగలుగుతున్నారన్నారు. ట్రాన్స్పోర్టేషన్ రంగంలో భారీ వృద్ధి నమోదవుతుందన్నారు. 2013–14లో రూ. 4770 కోట్లుగా ఉన్న టోల్ఆదాయం, ప్రస్తుతం రూ. 41,342 కోట్లకు పెరగడమే ఇందుకు నిదర్శనమన్నారు. దీన్ని రానున్న కాలంలో రూ. 1,30,000 కోట్లకు పెంచాలనే లక్ష్యంతో మరిన్ని ప్రాంతాలకు రోడ్ల విస్తరణ చేపడుతున్నామని గడ్కరీ స్పష్టం చేశారు. టోల్ప్లాజాల వద్ద అత్యాధునిక సాంకేతికతను వినియోగించేందుకు కేంద్రం చర్యలు తీసుకుంటుందన్నారు. దీనివల్ల టోల్ల వద్ద రద్దీ సమస్యను పూర్తిగా అరికడతామన్నారు. ఉన్న రహదారులను పెంచడం, కొత్త రహదారులను నిర్మించడం, ఆయా చోట్ల బైపాస్లు, అండర్పాస్ల నిర్మాణం కోసం కేంద్రం పెద్ద ఎత్తున ఖర్చు చేస్తుందన్నారు. ఇప్పటికే చాలాచోట్ల పనులు పూర్తయ్యాయని, మరిన్ని చోట్ల పనులు పూర్తి చేసేందుకు యుద్ధ ప్రాతిపదికన పనులు కొనసాగిస్తున్నామని గడ్కరీ స్పష్టం చేశారు.
