కొరఢా ఝుళిపించిన ఈసీ
- నలుగురు కలెక్టర్లు, 13 మంది ఎస్పీల బదిలీ
- హైదరాబాద్, వరంగల్, నిజామాబాద్ కమిషనర్లకూ స్థానచలనం
- రవాణా, ఎక్సైజ్ శాఖల కార్యదర్శులకు ట్రాన్స్ఫర్
ముద్ర, తెలంగాణ బ్యూరో : ఎన్నికల కమిషన్ కొరఢా ఝుళిపించింది. రాష్ట్రంలో పలువురు జిల్లా కలెక్టర్లు, 13 మంది ఎస్పీలు, పోలీస్కమిషనర్ల బదిలీకి ఈసీ ఆదేశించింది. యాదాద్రి, నిర్మల్, రంగారెడ్డి, మేడ్చల్ మల్కాజిగిరి కలెక్టర్లు వినయ్ కృష్ణారెడ్డి, వరుణ్రెడ్డి, హరీశ్, అమయ్ కుమార్ ల బదిలీ, వరంగల్ పోలీస్ కమిషనర్ రంగనాథ్, హైదరాబాద్ సీపీ సీవీ ఆనంద్, నిజామాబాద్, ఖమ్మం సీపీలు సత్యనారాయణ, విష్ణు ఎస్వారియర్ను బదిలీ చేయాలని బుధవారం ఆదేశించడం కలకలం రేపింది. ట్రాన్స్ ఫర్అయిన శాఖలకు వెంటనే ప్రత్యేక కార్యదర్శులను నియమించాలని ప్రభుత్వాన్ని ఆదేశించింది. గురువారం సాయంత్రం 5 గంటలలోపు ప్యానల్కు పంపాలని ఈసీ తెలిపింది.
ALSO READ: బీఆర్ఎస్కు అనుకూలతే కారణమా..?
వీరితో పాటు రవాణా శాఖ కార్యదర్శి శ్రీనివాస రాజు, ఎక్సైజ్ శాఖ డైరెక్టర్ ముషారఫ్అలీ పారూఖీ, వాణిజ్య పన్నుల శాఖ కమిషనర్ టికె శ్రీదేవీలను బదిలీ చేయాలని ఈసీ ఆదేశాలు జారీ చేసింది. అలాగే ఎక్సైజ్, వాణిజ్య పన్నుల శాఖకు ప్రత్యేక కార్యదర్శులను నియమించాలని ఆదేశించింది. అయితే పని అధికారుల పనితీరే ప్రామాణికంగా సీఈసీ ఈ నిర్ణయం తీసుకున్నట్లుగా ప్రచారం జరుగుతోంది. కాగా ఈ నెల 3 నుంచి 5 వరకు తెలంగాణలో పర్యటించిన కేంద్ర ఎన్నికల సంఘం ఎలక్షన్ల నిర్వహణపై హైదరాబాద్లో సమీక్ష నిర్వహించిన విషయం తెలిసిందే. ఇందులో పలు ప్రభుత్వ శాఖలతో పాటు పోలీస్ శాఖ సమీక్షలో పలువురు అధికారుల పనితీరుపై ఎన్నికల సంఘం తీవ్ర అసంతృప్తి వ్యక్తం చేసింది. అదే సమయంలో ఎన్నికల కమిషనర్రాజీవ్కుమార్పనితీరుపై సదరు అధికారులను హెచ్చరించారు. పారదర్శకంగా పని చేయాల్సిన అత్యున్నత హోదా కలిగిన అధికారులే పక్షపాతంగా వ్యవహరిస్తున్న తీరుపై మండిపడ్డ సీఈసీ వారిపై బదిలీ వేటు వేయడం సంచలనం రేపుతోంది. ఈ మేరకు నేడు 5 గంటల్లోపు ప్యానల్ పంపాలని సీఎస్ శాంతికుమారిని ఆదేశించింది.