ఈపీఎఎఫ్​ఓ గుడ్​న్యూస్ - ​ డేట్​ఆఫ్​ఎగ్జిట్​కు పరిష్కారం

ముంబై: ఉద్యోగులకు ఎంప్లాయీస్ ప్రావిడెంట్ ఫండ్ ఆర్గనైజేషన్ ఈపీఎఫ్ఓ గుడ్‌న్యూస్ చెప్పింది. ఎవరైనా కొత్త కంపెనీలో చేరినప్పుడు పాత ఈపీఎఫ్ అకౌంట్ వివరాలు సరిగ్గా ఉన్నాయో లేదో చెక్ చేసుకోవాలి. ఇక్కడే కొందరికి ‘డేట్ ఆఫ్ ఎగ్జిట్’ సమస్య ఎదురవుతోంది. ఈ డేట్ ఆఫ్ ఎగ్జిట్ ని ఆప్‌డేట్ చేసే అధికారం కంపెనీలకే కాకుండా ఉద్యోగులకు కూడా ఉందని ఇటీవలే వెల్లడించింది.

కెరీర్ కోసం ఉద్యోగులు ఒక కంపెనీ నుంచి మరో కంపెనీకి జాబ్ మారుతుంటారు. ఇలా జాబ్ మారుతున్నప్పుడు పీఎఫ్ ఖాతా విషయంలో చాలా మందికి ఇబ్బందులు ఏర్పడేవి. పాత కంపెనీలో ఎగ్జిట్ ఫార్మాలిటీస్ పూర్తి చేయాల్సి ఉంటుంది. ప్రధానంగా ప్రావిడెంట్ ఫండ్‌కి సంబందించిన క్లియరెన్స్ తీసుకోవాలి. ఈ క్రమంలో చాలా మంది ఎలా పూర్తి చేయాలో తెలియక సమస్యలు ఎదుర్కొనే వారు. అయితే, అలాంటి వారికి గుడ్‌న్యూస్ చెప్పింది ఎంప్లాయీస్ ప్రావిడెంట్ ఫండ్ ఆర్గనైజేషన్ ఈపీఎఫ్ఓ. పీఎఫ్‌కు సంబంధించిన వివిధ సేవలను ఆన్‌లైన్ ద్వారా అందిస్తోంది. 

ఉద్యోగి కంపెనీ మారినప్పుడు ఈ సంస్థ ఉద్యోగిగా కొత్త పీఎఫ్ మెంబర్ ఐడీని తీసుకోవాల్సి ఉంటుంది. ఆ తర్వాతే పాత పీఎఫ్ అకౌంట్‌లోని ప్రావిడెంట్ ఫండ్‌ని ట్రాన్స్‌ఫర్ చేసుకోవచ్చు. యూనిక్ ఐడెంటిఫికేషన్ నంబర్ సహాయంతో కొత్త పీఎఫ్ ఖాతాను తెరవొచ్చు. ఉద్యోగులు డేట్ ఆఫ్ ఎగ్జిట్‌ని అప్‌డేట్ చేసుకోవడానికి మెంబర్ సేవా పోర్టల్‌లోకి లాగిన్ అవ్వాలని ఈపీఎఫ్ఓ తెలిపింది.

• డేట్ ఆఫ్ ఎగ్జిట్ ఎలా ఇవ్వాలి?

ముందుగా https://unifiedportal-mem.epfindia.gov.in/memberinterface/ మెంబర్ సేవా పోర్టల్‌ని సందర్శించాలి.
మీ యూఎఎన్​నంబర్, పాస్‌వర్డ్ ఎంటర్ చేయాలి.
ఆ తర్వాత మేనేజ్ ట్యాబ్‌పై క్లిక్ చేయాలి. ఇందులోని డ్రాప్ డౌన్ లిస్టులో మార్క్ ఎగ్జిట్ ఆప్షన్‌ని ఎంచుకోవాలి.
ఆ తర్వాత కొత్త పేజీ ఓపెన్ అవుతుంది.
ఇందులో సెలక్ట్ ఎంప్లాయ్‌మెంట్ ఆప్షన్ వద్దనున్న డ్రాప్‌డౌన్ లిస్టుపై క్లిక్ చేయాలి.
ఉద్యోగి పనిచేసిన కంపెనీలకు సంబంధించిన పీఎఫ్ అకౌంట్‌లు ఇందులో ఉంటాయి. వీటిలో ప్రీవియస్ కంపెనీ పీఎఫ్ అకౌంట్‌ని ఎంచుకోవాలి.
కంపెనీలో పనిచేసిన చివరి రోజు(డేట్ ఆఫ్ ఎగ్జిట్)ను ఎంటర్ చేయాలి.
అదే డేట్‌ను మరోసారి ఎంటర్ చేయాలి. తర్వాత కంపెనీ నుంచి బయటకు వచ్చినందుకు గల కారణాన్ని పేర్కొనాలి.
కంపెనీ మారారు కాబట్టి సెషేషన్ ఎంచుకోవాలి. ఆ తర్వాత ఓటీపీని రిక్వెస్ట్ చేయాలి.
మీ రిజిస్టర్డ్ మొబైల్ నంబర్‌కి వచ్చిన ఓటీపీని ఎంటర్ చేసి చెక్ బాక్స్‌పై సెలక్ట్ చేసుకోవాలి.
అప్‌డేట్‌పై క్లిక్ చేసి ఓకే ఆప్షన్ క్లిక్ చేయాలి. మీ ప్రాసెస్ పూర్తవుతుంది.
కంపెనీ మారిన అనంతరం రెండు నెలల వరకు డేట్ ఆఫ్ ఎగ్జిట్ అప్‌డేట్ చేసేందుకు వీలుండదు.
రెండు నెలల వరకు ఎలాంటి ట్రాన్సాక్షన్లు జరగకుంటే అప్పుడు డేట్ ఆఫ్ ఎగ్జిట్ రిక్వెస్ట్‌ను సిస్టమ్ యాక్సెప్ట్ చేస్తుంది.