వెనక్కు తగ్గిన వేగనార్
![వెనక్కు తగ్గిన వేగనార్](https://mudranews.in/uploads/images/2023/06/image_750x_64992e90d6d3f.jpg)
- మధ్యవర్తిత్వం వహించిన బెలారస్ అధ్యక్షుడు లుకాషెంకో
- వెనక్కు తగ్గిన ప్రిగోజిన్, పుతిన్
- రష్యన్ ప్రజల హర్షం
మాస్కో: రష్యాపై తిరుగుబాటు బావుటా ఎగురవేసి మాస్కో దిశగా తన ప్రైవేటు సైన్యంతో చుట్టుముట్టేందుకు నిర్ణయించిన ప్రిగోజిన్ తన నిర్ణయాన్ని వెనక్కు తీసుకొని తన సైన్యాన్ని ఉక్రెయిన్బోర్డర్లోని బంకర్లకు తరలించారు. ఈ నిర్ణయంతో ఇటు రష్యన్లు, ప్రపంచదేశాలు ఉపిరిపీల్చుకున్నాయి. మరోవైపు పుతిన్ వార్నింగ్కు భయపడి ప్రిగోజిన్ తన నిర్ణయాన్ని ఉపసంహరించుకున్నట్లు కూడా చెబుతున్నారు. కాగా ప్రిగోజిన్, పుతిన్మధ్య సయోధ్యకు బెలారస్ అధ్యక్షుడు అలెగ్జాండర్ లుకాషెంకో మధ్యవర్తిత్వం వహించడం వల్లే వేగనార్ సైన్యం వెనక్కి తగ్గినట్లు ఆ దేశ మీడియా ప్రకటించింది. ఏది ఏమైనా ప్రిగోజిన్ నిర్ణయాన్ని రష్యన్లు కూడా స్వాగతించారు. ఈ సందర్భంగా వేగనార్ సైన్యం తమ భారీ యుద్ధట్యాంకులు, కాన్వాయ్తో వెళుతుండగా చప్పట్లతో హర్షం వ్యక్తం చేశారు. ఈ విషయంపై వేగనార్ సైన్యం అధ్యక్షుడు ప్రిగోజిన్ మీడియాతో మాట్లాడుతూ.. వేగనార్కు రష్యన్ల రక్తం చిందించడం ఇష్టం లేదన్నారు. తాము నిజమైన దేశభక్తులమైనందునే తమ నిర్ణయాన్ని ఉపసంహరించుకున్నామన్నారు. పుతిన్ తమను దేశద్రోహులని పెద్ద తప్పుచేశాడన్నారు. దీనికి మూల్యం పుతిన్ చెల్లించుకుంటారని హెచ్చరించారు. ప్రజాక్షేత్రంలో శాంతిస్థాపనే తమ ఉద్దేశ్యంగా ప్రిగోజిన్ ప్రకటించారు. అందువల్లే వెనక్కు తగ్గామన్నారు.
ఈ తిరుగుబాటు బావుటాపై వెనక్కు తగ్గడంతో ఇటు పుతిన్కూడా చల్లబడ్డారు. శనివారం వేగనార్ సైన్యానికి ధీటుగా జవాబివ్వాలన్న, ప్రిగోజిన్ను అరెస్టు చేయాలన్న నిర్ణయాన్ని ఉపసంహరించుకున్నట్లు స్థానిక మీడియా వెల్లడించింది. ఈ నేపథ్యంలో ఇరువురి మధ్య సఖ్యత కుదిర్చిన బెలారస్ అధ్యక్షుడేనని మీడియా స్పష్టం చేసింది. ఆయన మధ్యవర్తిత్వంపై ఇటు రష్యన్లు, అటు వేగనార్ సైన్యం కూడా హర్షం వ్యక్తం చేస్తున్నాయి. మరోవైపు రష్యా చర్యలపై ఉక్రెయిన్ అధ్యక్షుడు జెలెన్స్కీ ఆగ్రహం వ్యక్తం చేశాడు. తాను తవ్వుగోతిలో తనే పడ్డాడని వ్యాఖ్యానించాడు. శాంతికాముక దేశంగా ఉన్న ఉక్రెయిన్లో ప్రైవేటు సైన్యాన్ని మోపే ఆరోపణ నిజమేనని ఈ ఘటనతో ప్రపంచదేశాలకు తెలిసివచ్చిందన్నారు. వేగనార్ తిరుగుబాటు బావుటాతో రష్యా సైనిక బలం తగ్గిందని అన్నారు. ఇతరులను నాశనం చేద్దామనుకున్న పుతిన్కు తగిన శాస్తే జరిగిందని శాపనార్థాలు పెట్టాడు జెలెన్స్కీ.