అంతా మీ ఇష్టమా..?
sharma 
- టీఎస్పీఎస్సీపై హైకోర్టు ఆగ్రహం
- జేఎల్ నియామక పరీక్షపై కీలక వ్యాఖ్యలు
- తెలుగు కూడా ప్రశ్నా పత్రం ఇవ్వాలని ఆదేశం
ముద్ర, తెలంగాణ బ్యూరో: తెలంగాణ పబ్లిక్ సర్వీస్ కమిషన్ కు హైకోర్టు అక్షింతలు వేసింది. ఇష్టానుసారంగా పరీక్షలు నిర్వహించడం సరికాదంటూ సూచించింది. ఈ సందర్భంగా జేఎల్ నియామక పరీక్ష ప్రశ్నపత్రంపై హైకోర్టు కీలక ఉత్తర్వులు జారీ చేసింది. జూనియర్ లెక్చరర్ పేపర్– 2 ప్రశ్నపత్రం తెలుగులోనూ ఇవ్వాలని హైకోర్టు ఆదేశించింది. పేపర్– 2 ఆంగ్లంలోనే ఇవ్వాలన్న తెలంగాణ పబ్లిక్ సర్వీస్ కమిషన్ (టీఎస్పీఎస్సీ) నిర్ణయంపై హైకోర్టు విచారణ చేపట్టింది. ఈ సందర్భంగా పిటిషనర్లు, టీఎస్పీఎస్ఈస తరపున వాదనలు పూర్తయిన తర్వాత.. పేపర్– 2 ప్రశ్నపత్రం ఇంగ్లీషు, తెలుగులో ఇవ్వాలని టీఎస్పీఎస్సీకి హైకోర్టు ఆదేశించింది. టీఎస్పీఎస్సీ ఇష్టానుసారంగా పరీక్షలు నిర్వహించడం సరికాదని హెచ్చరించింది.
జూనియర్ లెక్చరర్ పోస్టుల భర్తీ నిమిత్తం గతేడాది డిసెంబరు 9న జారీ చేసిన నోటిఫికేషన్‌ ప్రకారం నిర్వహించే పరీక్షలకు ప్రశ్నపత్రాలను ఆంగ్లంలోనే ఇవ్వడాన్ని సవాల్‌ చేస్తూ ఆదిలాబాద్‌కు చెందిన టి.విజయ్‌కుమార్‌ హైకోర్టులో పిటిషన్‌ దాఖలు చేశారు. దీనిపై విచారణ చేపట్టిన న్యాయస్థానం.. ఇష్టానుసారంగా పరీక్షలు నిర్వహించడం సరికాదని వ్యాఖ్యానించింది. జేఎల్ పేపర్–-2 ప్రశ్నపత్రం ఆంగ్లం, తెలుగులో ఇవ్వాలని ఆదేశించింది.
