Bridge Collapses Bihar: బీహార్లో చూస్తుండగానే గంగలో కూలిన వంతెన!
ముద్ర వార్తలు 
- రూ. 1717 కోట్లు నీటిపాలు
- విచారకరమన్న జేడీయూ నేతలు
బీహార్: బీహార్భగల్పూర్లో రూ. 1717 కోట్లతో నిర్మిస్తున్న ఓ బ్రిడ్జి ఆదివారం కుప్పకూలింది. గంగా నదిపై నిర్మించిన ఈ బ్రిడ్జి కుప్పకూలుతున్న వీడియో బయటకు రావడంతో ఆందోళన వ్యక్తం అవుతోంది. బ్రిడ్జి కూలిన ఘటనలో ప్రాణ, ఆస్తి నష్టం జరగలేదని స్థానిక అధికారులు వెల్లడించారు. ఈ వంతెన కగాడియా–అగువానీ–సుల్తాన్గంజ్ల మధ్య నిర్మితమవుతోంది. రెండేళ్ల క్రితం కూడా ఈ వంతెనకు సంబంధించిన కొంతభాగం ధ్వంసమైంది. నాలుగేళ్ల క్రితం బ్రిడ్జి నిర్మాణానికి బీహార్ సీఎం నితీశ్కుమార్ శ్రీకారం చుట్టారు. దీని నిర్మాణం రూ. 1717 కోట్లతో చేపడుతున్నట్లు అధికారులు వెల్లడించారు.
WATCH HERE: https://twitter.com/i/status/1665356191453544448
ఈ వంతెనలోని కొంత భాగానికి ఏప్రిల్లో వచ్చిన భీకర గాలుల వల్ల కూడా కొంతమేర నష్టం వాటిల్లినట్లు తెలుస్తోంది. వీడియోలో చూస్తుండగానే వంతెన గంగలో కూలిపోతుండడం కనిపిస్తుంది. వంతెన కూలిన విషయంపై ఇంకా వివరాలు వెల్లడి కాలేదు. వంతెన కూలిపోవడంతో జేడీయూ పార్టీ నేతలు మాట్లాడుతూ.. ఈ ఘటన దురదృష్టకరమన్నారు. ఈ ఏడాది నవంబర్లో దీన్ని ప్రారంభించాలని అనుకున్నామన్నారు. వంతెన కూలిపోవడం వెనుక ఉన్న కారణాన్ని ఆరాతీసేందుకు విచారణకు ఆదేశించాలని ప్రభుత్వాన్ని కోరారు. నాసిరకమైన వంతెన నిర్మాణం చేపట్టినందుకు కాంట్రాక్టర్పై కఠిన చర్యలు తీసుకోవాలన్నారు.
