ఇక భారత్సింగపూర్ల మధ్య డిజిటల్ చెల్లింపులు
sharma 
- ఇరుదేశాల మధ్య ఒప్పంద పత్రాలపై సంతకాలు
- సేవలు సులభతరం, బందాలు బలోపేతమే లక్ష్యమన్న ప్రధాని మోడీ
న్యూఢిల్లీ: భారత్ సింగపూర్ల మధ్య డిజిటల్ చెల్లింపుల ఒప్పందం చారిత్రాత్మక విజయమని దీంతో ఇరుదేశాల బంధాలు మరింత బలోపేతం అవుతాయని, తద్వారా సింగపూర్లో నివసించే భారతీయులకు సులభంగా నగదు బదిలీ చేయొచ్చని ప్రధానమంత్రి నరేంద్రమోడీ స్పష్టం చేశారు. డిజిటల్ చెల్లింపుల రంగంలో ప్రధాని నరేంద్ర మోదీ, సింగపూర్ ప్రధాన మంత్రి లీ సీన్ లూంగ్ మంగళవారం వీడియో కాన్ఫరెన్స్ ద్వారా ఇరుదేశాల మధ్య డిజిటల్ చెల్లింపుల ఒప్పందాలను సంతకాలు చేసి ప్రారంభించారు. భారతదేశం యూపీఏ అంటే యూనిఫైడ్ పేమెంట్ ఇంటర్‌ఫేస్, సింగపూర్‌లోని ‘పే నౌ’ని కనెక్ట్ చేయడం ద్వారా రెండు దేశాల మధ్య క్రాస్-బోర్డర్ చెల్లింపు కనెక్టివిటీ ప్రారంభించబడింది. ఈ సదుపాయాన్ని భారతదేశం నుంచి ఆర్‌బిఐ గవర్నర్ శక్తికాంత దాస్, సింగపూర్ నుంచి మానిటరీ అథారిటీ ఆఫ్ సింగపూర్ మేనేజింగ్ డైరెక్టర్ రవి మీనన్ ప్రారంభించారు.
ఈ సందర్భంగా ప్రధాని నరేంద్ర మోదీ మాట్లాడుతూ డిజిటల్ చెల్లింపుల రంగంలో నూతన అధ్యాయానికి భారత్ శ్రీకారం చుట్టిందన్నారు. దీని ద్వారా సింగపూర్భారత్ల మధ్య మరిన్ని అభివృద్ధి కార్యక్రమాలకు ఊతం లభించడమే గాకుండా నగదు చెల్లింపులు కూడా సులభతరం అవుతాయన్నారు. ఎంతోమంది భారత వ్యాపారులు సింగపూర్లో వ్యాపారం చేస్తున్నారన్నారు. విద్యార్థులు కూడా అక్కడ చదువుకుంటున్నారన్నారు. వీరికి ఇక్కడి నుంచి బ్యాంకు ద్వారా కాకుండా ఇక నేరుగా యూపీఐ ద్వారా చెల్లింపులు చేయడం సులభతమవుతుందన్నారు. భారత్ నుంచి అనేక వస్తువుల ఎగుమతులు, దిగుమతులు జరుగుతుంటాయన్నారు. ఈ నేపథ్యంలో డిజిటల్ చెల్లింపులు కీలక భాగస్వామ్యాన్ని పోషిస్తాయని ప్రధాని నరేంద్రమోడీ ఆశాభావం వ్యక్తం చేశారు.
