చంద్రయాన్–3 ల్యాండింగే చివరి అంకం
sharma 
- అధిగమించి భారత కీర్తిపతాకాలు ఎగురవేస్తామన్న శాస్ర్తవేత్తలు
శ్రీహరికోట: భారత అంతరిక్ష పరిశోధనా సంస్థ ఇస్రో ప్రతిష్టాత్మకంగా చేపట్టిన చంద్రయాన్–-3 మరో రెండు రోజుల్లో చంద్రుడిపై ల్యాండ్ కానుంది. ఇప్పటికే ల్యాండర్ కక్ష్యను రెండుసార్లు విజయవంతంగా తగ్గించిన ఇస్రో చంద్రయాన్-–3 పంపిన మరిన్ని చంద్రుడి చిత్రాలను విడుదల చేసింది. ల్యాండింగ్విషయంలో ఎలాంటి ప్రదేశమైతే అనుకూలం అనే అంశాలపై ఇస్రో పరిశోధన చేసింది. దానికి సంబంధించిన ఫోటోలను తన అధికారిక సోషల్ మీడియా ఖాతా ద్వారా షేర్ చేసింది. ఈ ఫోటోల్లో లోయల మాదిరిగా ఉన్న బిలాలు, మైదాన, కొండ ప్రాంతాల మాదిరిగా కనిపిస్తున్నాయి. విక్రమ్ ల్యాండర్ సోమవారం తెల్లవారుజామున 3 గంటల ప్రాంతంలో చంద్రుడి అత్యంత సమీపానికి చేరుకున్నట్లు ఇస్రో స్పష్టం చేసింది.
ఇన్నిరోజులు ఒక ఎత్తు అయితే డీబూస్టింగ్, ల్యాండింగ్లు మరో ఎత్తని, కత్తిమీద సాములాంటివని శాస్ర్తవేత్తలు తెలిపారు. డీబూస్టింగ్ చేపట్టేటప్పుడు వాహక నౌక కక్ష్య నుంచి తప్పుకోకుండా క్రమేణా వేగం తగ్గించగలిగామన్నారు. రెండోసారి కూడా డీ బూస్టింగ్ ప్రక్రియ విజయవంతంగా పూర్తవడంతో ఇక చివరి అంకం ల్యాండింగ్ మాత్రమే మిగిలి ఉందన్నారు. దీన్ని కూడా అధిగమించి ప్రపంచంలో చంద్రునిపై రోవర్పంపిన నాలుగో దేశంగా భారత్కీర్తిని విస్తరింపచేస్తామన్నారు.
