ముగ్గురు మావోయిస్టుల లొంగుబాటు..
sharma 
ముద్ర ప్రతినిధి, జయశంకర్ భూపాలపల్లి: ములుగు జిల్లాలోని ఏటూరునాగారం ఏఎస్పీ సిరిశెట్టి సంకీర్త్ సమక్షంలో బుధవారం ముగ్గురు మావోయిస్టులు లొంగిపోయారు. తెలంగాణ సరిహద్దు ప్రాంతమైన చత్తీస్గఢ్ అటవీ ప్రాంతంలో గల గ్రామాల నుండి మద్వి ఆదామ కమలేష్(32), సుంకరి నారాయణ(30), సుంకరి సుధాకర్(35)లు లొంగిపోయినట్లు ఏఎస్పీ సిరిశెట్టి సంకీర్త్ తెలిపారు. ఈ మేరకు వారు మాట్లాడుతూ వారి గ్రామాల్లో జరుగుతున్న అభివృద్ధి కార్యక్రమాలను తెలుసుకుని సాధారణ జీవితం గడపడానికి మావోయిస్టు పార్టీని వారు వీడినట్టు చెప్పారు.
ప్రభుత్వ సంక్షేమ పథకాలు, కార్యక్రమాలను సద్వినియోగం చేసుకునేందుకు, వారి కుటుంబసభ్యుల భవిష్యత్కోసం పనిచేయాలని నిర్ణయించుకుని పోలీసులకు లొంగిపోయారని తెలిపారు. మిలీషియా సభ్యులందరికీ అవసరమైన సహాయం అందించడానికి తదుపరి చర్యలు తీసుకుంటామని ఆయన వెల్లడించారు. వీరు వెంకటాపురం పోలీసుల ఆధ్వర్యంలో లొంగిపోగా, అక్కడి పోలీసులను ఏఎస్పీ అభినందించారు.
