కారెక్కనున్న ‘కుంభం’
sharma 
- బీఆర్ఎస్లో చేరనున్న కాంగ్రెస్ యాదాద్రి జిల్లా అధ్యక్షుడు
- కోమటిరెడ్డి వెంకట్రెడ్డితో విభేదాలే కారణమా?
- మంత్రి జగదీశ్వర్రెడ్డితో కలిసి కేసీఆర్ తో భేటీ
- బీఆర్ఎస్భువనగిరి ఎంపీగా పోటీకి సీఎం హామీ?
ముద్ర, తెలంగాణ బ్యూరో/ ముద్ర, ప్రతినిధి భువనగిరి : కాంగ్రెస్ కీలక నేత కుంభం అనిల్కుమార్రెడ్డి బీఆర్ఎస్లో చేరేందుకు రంగం సిద్ధమైంది. కాంగ్రెస్లో నెలకొన్న వర్గ విభేదాల నేపథ్యంలో నాటకీయ పరిణామాల మధ్య ఆయన సోమవారం సాయంత్రం ప్రగతిభవన్లో ప్రత్యక్షమయ్యారు. మంత్రి జగదీశ్రెడ్డి, భువనగిరి ఎమ్మెల్యే పైళ్ల శేఖర్రెడ్డితో కలిసి సీఎం కేసీఆర్తో భేటీ అయ్యారు. ఎంపీ కోమటిరెడ్డి తీరు మారకపోతే పార్టీ వీడుతానని సోమవారం ఉదయం జరిగిన పార్టీ ముఖ్య నేతల సమావేశంలో సంకేతాలిచ్చిన కుంభం.. సాయంత్రం ఉమ్మడి నల్లగొండ జిల్లా మంత్రి జగదీశ్వర్రెడ్డి తో కలిసి ప్రగతిభవన్కు సీఎం కేసీఆర్తో భేటీ కావడం చర్చనీయాంశంగా మారింది. దీంతో ఆయనకు వచ్చే ఎన్నికల్లో భువనగిరి ఎంపీగా అవకాశం కల్పించేందుకు బీఆర్ఎస్అధినేత కేసీఆర్గ్రీన్సిగ్నల్ ఇచ్చినట్లు తెలుస్తున్నది. కుంభంతో పాటు వలిగొండ ఎంపీపీ నూతి రమేశ్ రాజు, వైస్ ఎంపీపీ బాతరాజ్ ఉమా బలనార్సింహ, వలిగొండ పట్టణ సర్పంచ్ బోల్ల లలిత శ్రీనివాస్, వలిగొండ మండల పార్టీ అధ్యక్షుడు పాశం సత్తి రెడ్డి, పట్టణ అధ్యక్షుడు కంకల కిష్టయ్య, ఆరుగురు ఎంపీటీసీలు 6 , ఏడుగురు సర్పంచులు, మండలవ్యాప్తంగా 50 మంది వార్డు మెంబర్లు, కాంగ్రెస్ పార్టీ ఎస్సీ సెల్, బీసీ సెల్ మండలాధ్యక్షుడు, వివిధ గ్రామాల పట్టణ అధ్యక్షులు, ముఖ్య కార్యకర్తలు సుమారు 250 మంది పార్టీ మారేందుకు సిద్ధమయ్యారు.
- భగ్గుమన్న వర్గ విభేదాలు..
భువనగిరి కాంగ్రెస్ లో వర్గ విభేదాలు భగ్గుమన్నాయి. బీఆర్ఎస్, బీజేపీల నుంచి కాంగ్రెస్లో చేరికల పర్వం ఊపందుకున్న వేళ.. యాదాద్రి భువనగిరి జిల్లా కాంగ్రెస్అధ్యక్షుడు కుంభం అనిల్కుమార్రెడ్డి పార్టీని వీడేందుకు సిద్ధమయ్యారు. భువనగిరి ఎంపీ కోమటిరెడ్డి వెంకట్రెడ్డి గ్రూపు రాజకీయాలకు వేగలేకపోతున్న కుంభం బీఆర్ఎస్ లో చేరాలని నిర్ణయించుకున్నారు. సోమవారం ఉదయం భువనగిరిలోని వివేరా హోటల్ లో పట్టణ, గ్రామ శాఖల కాంగ్రెస్ అధ్యక్ష, కార్యదర్శులు, ఇతర సీనియర్లతో సమావేశమైన కుంభం ఎంపీ కోమటిరెడ్డి వెంకటరెడ్డి వ్యవహార శైలీపై ఫైర్ అయ్యారు. పార్టీలో గ్రూప్ రాజకీయాలు చేస్తూ తనను ఇబ్బందులు గురి చేస్తున్నారని మండిపడ్డ ఆయన బీఆర్ఎస్ తనకు ఎమ్మెల్సీ పదవి ఆశ చూపిన పార్టీ విడలేదని ముఖ్య నేతల ముందు ఆవేదన వ్యక్తం చేశారు. కోమటిరెడ్డి తీరు మారకపోతే పార్టీ వీడుతానని సమావేశంలో సంకేతాలిచ్చిన కుంభం.. సాయంత్రం ఉమ్మడి నల్లగొండ జిల్లా మంత్రి జగదీశ్వర్రెడ్డి తో కలిసి ప్రగతిభవన్కు సీఎం కేసీఆర్తో భేటీ కావడం చర్చనీయాంశంగా మారింది. దీంతో ఆయనకు వచ్చే ఎన్నికల్లో భువనగిరి ఎంపీగా అవకాశం కల్పించేందుకు బీఆర్ఎస్అధినేత కేసీఆర్గ్రీన్సిగ్నల్ ఇచ్చినట్లు ప్రచారం జరుగుతోంది.
- విభేదాలకు కారణమిదే..!
కోమటిరెడ్డి వెంకట్రెడ్డి కి శిష్యుడిగా పేరున్న కుంభం అనిల్ గత ఎనిమిదేళ్ల నుంచి జిల్లా కాంగ్రెస్లో సేవలందిస్తున్నారు. కోమటిరెడ్డి వెంకట్రెడ్డి భువనగిరి ఎంపీగా గెలిచిన తర్వాత జిల్లాలో తన ప్రత్యేక వర్గాన్ని పెంచిపోషించడమే కాకుండా కుంభం అనుచరులను దూరంగా ఉంచుతున్నట్లు సమాచారం. జిల్లా అధ్యక్షుడి ప్రమేయం లేకుండానే పార్టీ కార్యక్రమాలు నిర్వహిస్తున్నట్లు ఆరోపణలున్నాయి. దీంతో జిల్లా కాంగ్రెస్కుంభం అనిల్ తో పాటు కోమటిరెడ్డి వర్గాలుగా చీలిపోయింది. తాజాగా.. వచ్చే ఎన్నికల్లో నల్లగొండ అసెంబ్లీ సెగ్మెంట్నుండి బరిలో ఉండాలని నిర్ణయించుకున్న కోమటిరెడ్డి గత కొంతకాలంగా తన ముఖ్య అనుచరుడు రామాంజనేయ గౌడ్ కు ప్రాధాన్యం ఇవ్వడం రాజకీయ చర్చకు దారితీసింది. ఇదే క్రమంలో తాజాగా కాంగ్రెస్లో బీసీ నినాదం బలపడుతోన్న క్రమంలో.. పార్లమెంట్పరిధిలో రెండు సీట్లు బీసీలకు ఇవ్వాలని కోమటిరెడ్డి అధిష్టానానికి ప్రాతిపాదించిన విషయం తెలిసిందే. దీంతో వచ్చే ఎన్నికల్లో కోమటిరెడ్డి నల్లగొండకు వెళితే.. భువనగిరి నుండి తన శిష్యుడు రామాంజనేయగౌడ్ను బరిలో దింపుతారని గత వారం రోజులుగా చర్చ జరుగుతోంది. కోమటిరెడ్డి వ్యవహారంపై అధిష్టానం సైతం నోరు మెదపకపోవడంతో అసంతృప్తితో ఉన్న కుంభం తన దారి తాను చూసుకోవాలని నిర్ణయించుకున్నారు. మరోవైపు.. టీపీసీసీ చీఫ్రేవంత్రెడ్డి కూతురు, కుంభం అనిల్కుమార్కూతురు ఓ చోట కలిసి చదువుకున్నారు. రేవంత్రెడ్డి పార్టీ అధ్యక్షుడిగా బాద్యతలు చేపట్టిన తర్వాత కుంభం అనిల్నేరుగా రేవంత్తో టచ్లోకి వెళ్లిపోయారు. దీంతో వీరిద్దరి మద్య సాన్నిహిత్యం పెరిగింది. దీంతో ఇప్పటికే రేవంత్తో విభేదాల ఆరోపణలు మూటగట్టుకున్న కోమటిరెడ్డి కుంభం కు చెక్పెట్టేలా వ్యవహరిస్తున్నారనే ప్రచారం జరుగుతోంది. కాగా కుంభం పార్టీ మారితే భువనగిరి జిల్లా కాంగ్రెస్ లో ఎలాంటి రాజకీయ సమీకరణాలు మారుతాయోనని పలువురు చర్చించుకుంటున్నారు.
